ఫ్యాన్ గాలి సునామీలో కొట్టుకుపోయిన ప్రతిపక్షాలు

ఏపీ మున్సిపల్ ఎన్నికల్లో అధికార పార్టీ ఎక్కువ సీట్లు పొందడమే కాదు అధిక సంఖ్యలో ఓట్లనూ కొల్లగొట్టింది. ఇక ఏపీలో తమకు తిరుగులేదు అన్నట్లుగా వైసీపీ దూసుకుపోతోంది. సాధారణంగా లోకల్ బాడీ ఎన్నికల్లో అధికార పార్టీ గెలవడం షరామాములే. కానీ ఈ రేంజ్‌లో సీట్లు, ఓట్లు రావడం ప్రతిపక్షాలకు మింగుడుపడటం లేదు. 2019 అసెంబ్లీ ఎన్నికల్లోనే వైసీపీకి వచ్చిన సీట్లు చూసి ఖంగుతిన్న ప్రతిపక్షాలు.. పురపాలక ఎన్నికల్లోనూ అదే సీన్ రిపీట్ కావడంతో ఏం చేయాలో తెలియక జుట్టు పీక్కుంటున్నాయి. ఈ ఎన్నికల్లో వైసీపీ ఓటుబ్యాంకు భారీగా పెరగడం గమనార్హం. ఇదే సమయంలో ప్రతిపక్షం టీడీపీ మాత్రం భారీగా ఓట్లు కోల్పోయింది. ఓట్ల శాతం చూస్తే.. వైసీపీ 53.63%, తెలుగు దేశం పార్టీ 30.73%, జనసేన 4.67%, భారతీయ జనతా పార్టీ 2.41, స్వతంత్రులు 5.37, నోటా ఆప్షన్‌కు 1.07% ఓట్లు పొందడం జరిగింది. ఇక కాంగ్రెస్, లెఫ్ట్ పార్టీలు కనీసం 1% ఓట్లనైనా పొందలేకపోయాయి.