అంతరిక్ష పరీక్షలలో చైనాను ధీటుగా ఎదుర్కొవడానికి క్వాడ్ క్వాడ్ భాగస్వామ్య దేశాలు కలిసి ముందడుగు వేయనున్నాయి. అమెరికా, భారత్, ఆస్ట్రేలియా, జపాన్ ఈ నాలుగు దేశాలు కీలక నిర్ణ‌యాలతో ముందుకు వెళ్తున్నాయి. ఈ నాలుగు దేశాలు ర‌క్ష‌ణ రంగంలోనే కాకుండా అంతరిక్ష రంగంలోనూ ఒప్పందాలు కుదుర్చుకుంటున్నాయి. వాతావరణ మార్పుల నియంత్ర‌ణ‌తో పాటు, భ‌విష్యత్‌ సాంకేతికతను సంయుక్తంగా అభివృద్ధి చేయడంపై ఆయా దేశాలు దృష్టి సారించనున్నాయి.
అమెరికాతో కలిసి అభివృద్ధి చేస్తున్న ‘నిసార్‌’ ఉపగ్రహం కోసం ఇస్రో ఒక ఎస్‌-బ్యాండ్‌ సింథటిక్‌ అపెర్చర్‌ రాడార్‌ను రూపొందించింది. వ‌చ్చే ఏడాది శ్రీహరికోట నుంచి దీన్ని ప్రయోగించనున్నారు. భారత చంద్రయాన్‌-3 ప్రాజెక్టులో నాసాకు చెందిన లేజర్‌ రిఫ్లెక్టోమీటర్‌ అరే (ఎల్‌ఆర్‌ఏ)ను అమర్చనున్నారు. అమెరికాతోనే కాకుండా జపాన్‌తోనూ స్నేహ బంధాన్ని ఇస్రో బలోపేతం చేసుకుంటోంది. ఈ రెండు దేశాలు భూ పరిశీలనతో పాటు చంద్రమండలంపై అన్వేషణ, ఉపగ్రహ నేవిగేషన్‌ వంటి విష‌యాల్లో కలిసి ప‌నిచేయ‌నున్నాయి. 2023 నాటికి చంద్రుడి దక్షిణ ధ్రువానికి ఒక వ్యోమనౌకను సంయుక్తంగా పంపాలని భారత్, జపాన్ నిర్ణ‌యం తీసుకున్నాయి.