హైదరాబాద్‌, ఆంధ్రప్రభ: నకిలీ సర్టిఫికెట్లను తయారు చేసేవారి, వాటితో విద్యా, ఉద్యోగం పొందాలనుకునే వారి ఆటలు ఇక సాగవు. ఎందుకంటే నకిలీ సర్టిఫికెట్లను ఇట్టే గుర్తించేలా ప్రత్యేక వెబ్‌సైట్‌ను తెలంగాణ ఉన్నత విద్యామండలి రూపొందించింది. ఇది త్వరలోనే అందుబాటులోకి రానుంది. ప్రభుత్వ, ప్రైవేట్‌ ఉద్యోగాలు, ప్రమోషన్ల కోసం ఏదోక యూనివర్సిటీ పేరుతో ఒరిజినల్‌ సర్టిఫికెట్‌కు పోలిన సర్టిఫికెట్లను తయారు చేసి అభ్యర్థులకు కొంత మంది కేటుగాళ్లు అంటగడుతున్నారు. వీటిని రూ.లక్షల్లో కొనుగోలు చేసినవారు ఉద్యోగాల కోసం సమర్పిస్తున్నారు.
ఉద్యోగ వెరిఫికేషన్‌లో దొరకని వాళ్లు అలాగే చలామణి అవుతుంటే, దొరికిన వారు మాత్రం ఇబ్బందులు ఎదుర్కొంటున్నారు. ఇది వర్సిటీలకు కూడా పెద్ద తలనొప్పిగా మారింది. పైగా ఇతర దేశాలు, రాష్ట్రాల్లో మన వర్సిటీలకు చెడ్డ పేరు కూడా వస్తోంది. దీన్ని అడ్డుకట్ట వేసేందుకు తెలంగాణ పోలీసుల సహకారంతో తెలంగాణ ఉన్నత విద్యామండలి ప్రత్యేక వెబ్‌సైట్‌ను రూపొందించింది. దాంట్లో 15 వర్సిటీల 20 ఏళ్ల నాటి ధ్రువపత్రాల వివరాలను పొందుపర్చింది. ఎక్కడైనా, ఎవరికైనా అనుమానం వస్తే ధ్రువపత్రాల వివరాలు, అభ్యర్థుల అప్పటి హాల్‌టికెట్‌ నంబర్లు అందులో ఎంటర్‌ చేస్తే పూర్తి సమాచారం వచ్చేలా దాన్ని రూపొందించారు. సమర్పించిన ధ్రువపత్రాలు నకిలీదో, అసలేదో ఇట్టే పసిగట్టి తద్వారా సంబంధిత వ్యక్తులపై చర్యలు తీసుకునేలా వెబ్‌సైట్‌ను రూపిందించారు.
ఇటీవల కాలంలో నకిలీ సర్టిఫికెట్ల తయారీ మూఠాలు చాలానే బయటపడుతున్నాయి. అయినా కానీ నకిలీ సర్టిఫికెట్ల వ్యవహారం ఆగడంలేదు. విద్యా సంస్థలు, కంపెనీలు ఎక్కువగా సర్టిఫికెట్‌ వెరిఫికేషన్‌ కోసం వర్సిటీలకు దరఖాస్తు చేస్తున్నప్పటికీ పరిశీలన ఆలస్యమవుతోంది. పరిశీలన పారదర్శకంగా ఉండేలా, సమయం ఎక్కువ తీసుకోకుండా ఉండేందుకు డీజిలాకర్‌తో అనుసంధానిస్తారు. అందులో అప్‌లోడ్‌ చేసిన సర్టిఫికెట్ల వివరాలు శాశ్వతంగా ఉండిపోతాయి. సర్టిఫికెట్లకు సంబంధించిన వివరాలు కావాలంటే తెలంగాణ ఉన్నత విద్యామండలి అధికారులను సంప్రదించాల్సి ఉంటుంది. దీన్ని అతిత్వరలోనే రాష్ట్ర విద్యాశాఖ మంత్రి సబితా ఇంద్రారెడ్డి ప్రారంభించనున్నారు.