TG: ప్రతిపక్షంపై సీఎం ఫైర్‌..!
సభను అడ్డుకునేందుకే వివాదాలు సృష్టించారు
ప్రజా సమస్యలపై చర్చ జరగకూడదనే ఉద్దేశంతోనే ప్రతిపక్ష నేతల ప్రయత్నాలు..
స్పీకర్‌ పదవిని గౌరవించాలి
TG: హైదరాబాద్, ఆంధ్రప్రభ : ప్రజా సమస్యలపై శాసనసభలో చర్చ జరగకుండా సభా కార్యక్రమాలను అడ్డుకునేందుకు రాష్ట్రంలోని ప్రధాన ప్రతిపక్ష పార్టీ నేతలు ఉద్దేశపూర్వకంగా ప్రయత్నించారని సీఎం రేవంత్‌రెడ్డి ఆరోపించారు. అసెంబ్లీలో ఆయన మాట్లాడుతూ.. సభ సజావుగా జరిగితే ప్రతిపక్ష నేతలు చేసినట్లు తాను పేర్కొన్న అంశాలు వెలుగులోకి వస్తాయనే భయంతోనే సమావేశాల తొలిరోజు నుంచి వివాదాలు సృష్టించారని అన్నారు.
అసెంబ్లీ వేదికగా ప్రజా సమస్యలపై చర్చించాల్సిన అవసరం ఉందని సీఎం పేర్కొన్నారు. ప్రభుత్వం చేపడుతున్న కార్యక్రమాలు, రాష్ట్ర ప్రజలకు సంబంధించిన అంశాలపై సభలో విస్తృతంగా చర్చించేందుకు ప్రభుత్వం సిద్ధంగా ఉందని ఆయన గతంలోనూ స్పష్టం చేశారు.
మహిళల ఆత్మగౌరవాన్ని కాపాడటమే తమ ప్రభుత్వ లక్ష్యమని రేవంత్‌రెడ్డి అన్నారు. మహిళల సంక్షేమం, సాధికారతకు ప్రభుత్వం ప్రాధాన్యం ఇస్తోందని పేర్కొన్నారు. మహిళలకు సంబంధించిన పథకాలు, సమస్యలపై సభలో చర్చించి అవసరమైన నిర్ణయాలు తీసుకోవాల్సిన బాధ్యత ప్రజాప్రతినిధులపై ఉందన్నారు.
శాసనసభ స్పీకర్‌ పదవిలో ఉన్న వ్యక్తిని దూషించడం సరికాదని సీఎం వ్యాఖ్యానించారు. స్పీకర్‌ స్థానంలో కూర్చున్న వ్యక్తికి సభను నడిపించే రాజ్యాంగబద్ధమైన బాధ్యత ఉంటుందని, ఆ పదవిలో ఉన్న వ్యక్తికి పార్టీ రాజకీయాలతో సంబంధం ఉండదని పేర్కొన్నారు. అసెంబ్లీ వ్యవహారాలు సజావుగా సాగేందుకు అధికార, ప్రతిపక్ష సభ్యులు సహకరించాలని సీఎం కోరారు. ప్రజల సమస్యలను చర్చించేందుకు ఉన్న శాసనసభ వేదికను రాజకీయ వివాదాలకు పరిమితం చేయకుండా నిర్మాణాత్మక చర్చలకు ఉపయోగించుకోవాలని అన్నారు.
