Thella Kagitham review and rating | ‘తెల్ల కాగితం’ బాగుందా? ప్లస్‌లు, మైనస్‌‌లు ఇవే!
ఆంధ్రప్రభ, వెబ్‌డెస్క్: టీనేజ్ వయసులో పుట్టే ప్రేమ, ఆ తొందరపాటులో తీసుకునే కొన్ని నిర్ణయాలు జీవితాలపై ఎలాంటి ప్రభావం చూపుతాయనే కాన్సెప్ట్‌తో తెరకెక్కిన చిత్రమే ‘తెల్ల కాగితం’. మంచి మెసేజ్ ఉన్న ఒక టీనేజ్ డ్రామాగా వచ్చిన ఈ సినిమా ప్రేక్షకులను ఎంతవరకు మెప్పించిందో రివ్యూలో చూద్దాం.
నటీనటులు: హర్ష్ రోషన్, నక్షత్ర, తదితరులు
దర్శకుడు: రమేష్ బండ్రెడ్డి
నిర్మాత: కృష్ణ కొమ్మలపాటి
సంగీతం: విజయ్ బుల్గానిన్
సినిమాటోగ్రఫీ: కేవీ గుహన్
కథేంటంటే..
రాము (హర్ష్ రోషన్), ఆశ (నక్షత్ర) స్కూల్ రోజుల్లోనే ప్రేమలో పడతారు. రాము ప్రవర్తన, స్కూల్ నేపథ్యం, వారిద్దరి మధ్య సాగే సరదా సన్నివేశాలతో కథ చాలా సహజంగా మొదలవుతుంది. అయితే టీనేజ్ వయసులో వీరు తీసుకున్న ఒక తొందరపాటు నిర్ణయం, దానివల్ల ఎదురైన టీన్ ప్రెగ్నెన్సీ సమస్య వీరి జీవితాలను ఎలాంటి మలుపు తిప్పాయనేదే ‘తెల్ల కాగితం’ ముఖ్య కథాంశం.
ఎలా ఉందంటే..
సినిమా ఫస్టాఫ్ చాలా హాయిగా సాగిపోతుంది. స్కూల్ లవ్ ట్రాక్, కామెడీ సీన్లు వినోదాన్ని అందిస్తాయి. రాము-ఆశల లవ్ స్టోరీ మొదట్లో బాగా కనెక్ట్ అవుతుంది. అయితే, ఇంటర్వెల్ తర్వాత సీరియస్ మోడ్ లోకి వెళ్లాక కథలో ఫస్టాఫ్‌లో ఉన్న సహజత్వం కొద్దిగా తగ్గుతుంది. టీన్ ప్రెగ్నెన్సీ పాయింట్ చుట్టూ సీన్లు నెమ్మదించడంతో పాటు, ఎమోషన్ కంటే కథను త్వరగా చెప్పేయాలనే ప్రయత్నం స్పష్టంగా కనిపిస్తుంది.
ముఖ్యంగా ప్రధాన పాత్రలు తీసుకునే కొన్ని నిర్ణయాలు సహజంగా అనిపించకపోవడంతో ఆడియన్స్ వారి సమస్యకు పూర్తిగా కనెక్ట్ అవ్వడం కష్టమవుతుంది. ક્లైమాక్స్‌లో మంచి ఎమోషన్ రాబట్టే ప్రయత్నం చేసినా, దానికి తగిన బలమైన బిల్డప్ లేకపోవడం కొంత నిరాశపరుస్తుంది.
నటీనటులు & సాంకేతిక వర్గం పనితీరు..
హర్ష్ రోషన్ ‘రాము’ పాత్రలో చాలా సహజంగా నటించాడు. నక్షత్రకు ఇది మొదటి సినిమానే అయినా తన రోల్‌కి పూర్తి న్యాయం చేసింది. టెక్నికల్ గా విజయ్ బుల్గానిన్ అందించిన సంగీతం సినిమాకు పెద్ద అసెట్. కేవీ గుహన్ కెమెరా పనితనం విజువల్స్‌‌ను చాలా ఆకట్టుకునేలా మార్చింది.
ప్లస్ పాయింట్స్:
- హర్ష్ రోషన్, నక్షత్ర నటన
- ఫస్టాఫ్‌లో లవ్ ట్రాక్ & కామెడీ
- విజయ్ బుల్గానిన్ సంగీతం, కేవీ గుహన్ సినిమాటోగ్రఫీ
మైనస్ పాయింట్స్..
- సెకండాఫ్‌లో నెమ్మదించిన స్క్రీన్‌ప్లే
- ఎమోషనల్ కనెక్టివిటీ లోపించడం
మంచి మెసేజ్‌తో మొదలై సరదా మూమెంట్స్ అందించిన ‘తెల్ల కాగితం’.. ఫస్టాఫ్‌లో ఉన్న గ్రిప్పింగ్ సెకండాఫ్‌లోనూ కొనసాగించి ఉంటే ఒక పర్ఫెక్ట్ టీనేజ్ డ్రామాగా నిలిచేది.
