- ఆర్థిక వృద్ధి, పర్యావరణ పరిరక్షణపై చ‌ర్చ..
- డిప్యూటీ సీఎం భట్టి అధ్యక్షతన సమావేశం
డాక్టర్ బి.ఆర్. అంబేద్కర్ రాష్ట్ర సచివాలయంలో ఆదాయ వనరుల సమీకరణపై తెలంగాణ ఉప ముఖ్యమంత్రి భట్టి విక్రమార్క (Bhatti Vikramarka) అధ్యక్షతన జరిగిన క్యాబినెట్ సబ్-కమిటీ (Cabinet Sub-Committee) సమావేశంలో కీలక నిర్ణయాలు తీసుకున్నారు. ఈ సమావేశంలో ఆర్థిక వృద్ధి, పర్యావరణ పరిరక్షణ(Economic growth and environmental protection)కు సంబంధించిన ముఖ్య అంశాలపై చర్చించారు.
కాలుష్య నియంత్రణకు ప్రాధాన్యత
హైదరాబాద్‌లోని ఔటర్ రింగ్ రోడ్డు (ORR) లోపల ఉన్న కాలుష్యకారక పరిశ్రమలను నగరం వెలుపలికి తరలించే ప్రక్రియను వేగవంతం చేయాలని ఉప ముఖ్యమంత్రి అధికారులను ఆదేశించారు. ఈ తరలింపునకు సంబంధించి స్పష్టమైన విధివిధానాలు, కాలపట్టికను తక్షణమే రూపొందించాలని సూచించారు. పెరుగుతున్న పట్టణీకరణ నేపథ్యంలో పర్యావరణ సమతుల్యతను కాపాడుకోవడం, ప్రజల ఆరోగ్యానికి భద్రత కల్పించడం ఈ నిర్ణయం వెనుక ప్రధాన ఉద్దేశ్యం అని భట్టి అన్నారు.
సామాన్యులకు అందుబాటులో గృహాలు
హౌసింగ్ బోర్డు (Housing Board) నిర్మించే ఇళ్ల అమ్మకం సామాన్యులకు అందుబాటులో ఉండేలా చూడాల్సిన అవసరాన్ని సమావేశంలో చర్చించారు. గృహ నిర్మాణ రంగంలో పారదర్శకతను పెంచడానికి, అర్హులైన ప్రతి ఒక్కరికీ సొంత ఇంటి కలను నెరవేర్చే దిశగా ప్రభుత్వం చర్యలు తీసుకుంటోందని పేర్కొన్నారు.
ఆదాయ వనరుల సమీకరణపై సమీక్ష
రాష్ట్ర ఆదాయ వనరులపై సమగ్ర సమీక్ష నిర్వహించారు. ముఖ్యంగా కమర్షియల్ టాక్స్, స్టాంప్స్ & రిజిస్ట్రేషన్, గనుల శాఖల ద్వారా వచ్చే ఆదాయాల్లో నమోదైన వృద్ధిని విశ్లేషించారు. రాష్ట్ర ఆర్థిక వ్యవస్థను పటిష్టం చేయడానికి, అభివృద్ధి కార్యక్రమాలకు నిధులు సమకూర్చడానికి ఈ శాఖల ఆదాయాన్ని మరింత పెంచే మార్గాలపై చర్చించారు.
ఈ సమావేశంలో మంత్రులు ఉత్తమ్ కుమార్ రెడ్డి, దుద్దిళ్ల శ్రీధర్ బాబు, జూపల్లి కృష్ణారావు తో పాటు ప్రభుత్వ ప్రధాన కార్యదర్శి, పలు కీలక శాఖల ఉన్నతాధికారులు పాల్గొన్నారు. రాష్ట్ర ఆర్థిక పురోగతికి, ప్రజల సంక్షేమానికి అవసరమైన చర్యలపై ఈ సమావేశం ఒక స్పష్టమైన దిశానిర్దేశం చేసింది.
