ఎంపీటీసీ, జడ్పీటీసీ ఎన్నికలకు పటిష్ట పోలీస్ బందోబస్తు

డ్రోన్లు, సీసీ కెమెరాలతో నిరంతర నిఘా..
సమస్యాత్మక ప్రాంతాలపై ప్రత్యేక దృష్టి

నరసరావుపేట క్రైం, ఆంధ్రప్రభ: పల్నాడు జిల్లా వ్యాప్తంగా నవంబర్ 5న జరగనున్న ఎంపీటీసీ, జడ్పీటీసీ ఎన్నికలను ప్రశాంతంగా నిర్వహించేందుకు పటిష్ట పోలీస్ బందోబస్తు ఏర్పాటు చేసినట్లు జిల్లా ఎస్పీ జగదీష్ అదహళ్లి తెలిపారు. ఎన్నికల సామగ్రి పంపిణీ నుంచి పోలింగ్ ముగిసి బ్యాలెట్ బాక్సులు స్ట్రాంగ్ రూమ్‌లకు చేరే వరకు నిరంతర భద్రత కల్పించనున్నట్లు వెల్లడించారు.

సమస్యాత్మక ప్రాంతాలు, పోలింగ్ కేంద్రాల వద్ద డ్రోన్లు, సీసీ కెమెరాల ద్వారా నిరంతర నిఘా ఏర్పాటు చేసినట్లు ఎస్పీ తెలిపారు. సమస్యాత్మక వ్యక్తులపై ముందస్తు బైండోవర్ చర్యలు పూర్తి చేశామన్నారు. ఎలాంటి అత్యవసర పరిస్థితులు ఎదురైనా వెంటనే స్పందించేందుకు మొబైల్ పోలీస్ బృందాలు, ప్రత్యేక బలగాలను సిద్ధంగా ఉంచినట్లు పేర్కొన్నారు.

ఎన్నికల సమయంలో మద్యం, నగదు అక్రమ రవాణాను అరికట్టేందుకు చెక్‌పోస్టులు, ఫ్లయింగ్ స్క్వాడ్ల ద్వారా ప్రత్యేక తనిఖీలు నిర్వహిస్తున్నట్లు వెల్లడించారు. ఎన్నికల ప్రవర్తనా నియమావళిని ఉల్లంఘించే వారిపై కఠిన చర్యలు తీసుకుంటామని హెచ్చరించారు.

ఓటర్లు ఎలాంటి ప్రలోభాలకు లొంగకుండా స్వేచ్ఛగా, నిర్భయంగా తమ ఓటు హక్కును వినియోగించుకోవాలని ఎస్పీ జగదీష్ అదహళ్లి సూచించారు. ఎన్నికలకు సంబంధించి ఏదైనా అత్యవసర సమాచారం లేదా సమస్య ఉంటే వెంటనే స్థానిక పోలీసులకు లేదా 100, 112 టోల్‌ఫ్రీ నంబర్లకు సమాచారం అందించాలని కోరారు.