ఐపీఎల్- 2021 తొలి మ్యాచ్‌లో తమకు అద్భుత విజయం దక్కడంలో కీలక పాత్ర పోషించిన బౌలర్‌ హర్షల్‌ పటేల్‌పై రాయల్‌ చాలెంజర్స్‌ బెంగళూరు జట్టు కెప్టెన్ కోహ్లీ ప్రశంసలు కురిపించాడు. ఇషాన్‌ కిషన్‌, హార్దిక్‌ పాండ్యా, కృనాల్‌ పాండ్యా, కీరన్‌ పొలార్డ్‌, మార్కో జెన్‌సన్‌ వంటి ముంబై ఇండియన్స్‌ కీలక ఆటగాళ్లను పెవిలియన్‌కు చేర్చి ఉత్కంఠ విజయంలో కీలక పాత్ర పోషించాడు. ఈ ప్రదర్శనపై కెప్టెన్ విరాట్ కోహ్లీ సంతోషం వ్యక్తం చేశాడు. డెత్‌ ఓవర్‌ బౌలర్‌గా తనను సీజన్‌ మొత్తం కొనసాగిస్తామని పేర్కొన్నాడు.
మ్యాచ్ అనంతరం కోహ్లి మాట్లాడుతూ.. ‘‘ఢిల్లీ నుంచి హర్షల్‌ను మేం కొనుగోలు చేశాం. తనదైన ప్రణాళికలతో, జట్టు తనపై పెట్టిన బాధ్యతను నెరవేర్చడంలో సఫలం అయ్యాడు. ఈ మ్యాచ్‌లో తను ఎంతో ప్రత్యేకంగా నిలిచాడు. డెత్‌ ఓవర్లలో తన సేవలు వినియోగించుకుంటాం. ఒక కెప్టెన్‌గా తన నుంచి నేనేం ఆశించానో, ఆ అంచనాలను తను అందుకున్నాడు’’ అని కితాబిచ్చాడు. ఇక జెమీసన్‌, యజువేంద్ర చహల్‌, మహ్మద్‌ సిరాజ్‌ సైతం శుభారంభం చేశారని కోహ్లి పేర్కొన్నాడు.