పారిస్ ఒలింపిక్స్ లో భారత్ తరఫున ప్రాతినిధ్యం వహించిన అథ్లెట్ల బృందాన్ని ప్రధానమంత్రి నరేంద్రమోడీ అభినందించారు. ఎర్ర‌కోట‌లో జ‌రిగిన స్వాతంత్ర్య దినోత్స‌వ వేడ‌క‌ల‌కు అతిథులుగా హ‌జరైన పారిస్ ఒలింపిక్స్ భారత బృందం క్రీడాకారులు నేటి మ‌ధ్యాహ్నం ప్రధాని నివాసంలో క‌లిసారు.. ఈ సందర్భంగా షూటర్‌ మను బాకర్ ఒలింపిక్‌ పతకం సాధించిన తన పిస్టల్‌ను ప్రధానికి చూపించింది. ఈ పిస్ట‌ల్ తోనే ప‌త‌కాలు సాధించ‌నంటూ ప్రధానికి వివ‌రించింది..
ఇక ఒలింపిక్స్‌లో వరుసగా రెండోసారి కాంస్యం సాధించిన భారత హాకీ పురుషుల జట్టు ప్రధానికి ప్రత్యేక కానుకనిచ్చింది. జట్టు ఆటగాళ్లంతా సంతకం చేసిన ఓ జెర్సీ, హాకీ స్టిక్‌ను మోడీకి అందించారు. ఒలింపిక్స్‌లో కాంస్యం అందుకున్న రెజ్లర్‌ అమన్‌ సెహ్రావత్‌ కూడా భారత జెర్సీని ప్రధానికి బహుమతిగా ఇచ్చారు. అనంతరం ప్రధాని క్రీడాకారుల మధ్య కలియ దిరుగుతూ వారితో సంభాషించారు.
ఒలింపిక్స్‌లో వారి అనుభవాలను అడిగి తెలుసుకున్నారు. ఈ సందర్భంగా ప్రధాని మాట్లాడుతూ.. ”పారిస్ ఒలింపిక్స్‌లో ఈ యువ ఆటగాళ్లు మన జాతీయ పతాకాన్ని రెపరెపలాడించారు. 140 కోట్ల మంది భారతీయుల తరఫున మీ అందరికీ అభినందనలు తెలియజేస్తున్నా. మరిన్ని కొత్త కలలు, ఆశయాలతో ముందుకెళ్దాం. వాటికి సాకారం కోసం నిరంతరం కృషి చేద్దాం” అని క్రీడాకారులను ప్రోత్సహించారు. ఈ కార్యక్రమంలో కేంద్ర క్రీడల శాఖ మంత్రి మన్‌సుఖ్‌ మాండవీయ, భారత ఒలింపిక్‌ సంఘం అధ్యక్షురాలు పీటీ ఉష పాల్గొన్నారు.