ఇండియా ఓపెన్‌ ప్రపంచ టూర్‌ సూపర్‌-750 బ్యాడ్మింటన్‌ టోర్నీలో భారత స్టార్ షట్లర్ పీవీ సింధు క్వార్టర్ ఫైనల్స్‌కు దూసుకెళ్లింది. ఢిల్లీలోని ఇందిరాగాంధీ ఇండోర్ స్టేడియంలో గురువారం జరిగిన మహిళల సింగిల్స్ రెండో రౌండ్‌లో రెండుసార్లు ఒలింపిక్స్ పతక విజేత తెలుగు తేజం పీవీ సింధు 21-15, 21-13తో జపాన్‌కు చెందిన మనమి సుజుపై వరుస గేమ్‌లలో విజయం సాధించింది.
46 నిమిషాల పాటు జరిగిన ఈ మ్యాచ్‌లో సింధు జపాన్ ప్రత్యర్థిపై పూర్తి ఆధిపత్యం ప్రదర్శించింది. తొలి గేమ్ నుంచి దూకుడుగా ఆడిన సింధు ఏకపక్షంగా మ్యాచ్ గెలిచి క్వార్టర్ ఫైనల్లోకి ప్రవేశించింది. ఇక శుక్రవారం జరిగే క్వార్టర్స్ పోరులో సింధు ఇండోనేషియాకు చెందిన జార్జియా మరిస్కాతో తలపడనుంది.
నాకౌట్‌కు సాత్విక్-చిరాగ్ జోడీ..
మరోవైపు పురుషుల సింగిల్స్‌లో కిరణ్ జార్జ్, డబుల్స్‌లో సాత్విక్-చిరాగ్ జోడీ నాకౌట్‌కు అర్హత సాధించింది. కిరణ్ జార్జ్ ప్రీ-క్వార్టర్స్ మ్యాచ్‌లో ఫ్రెంచ్ షట్లర్ అలెక్స్ లానియర్‌పై జార్జ్ 22-20, 21-13తో నెగ్గి వరుసగా రెండో విజయాన్ని నమోదు చేసుకున్నాడు.
భారత స్టార్ డబుల్స్ జోడీ సాత్విక్ సాయిరాజ్-చిరాగ్ శెట్టి కూడా నాకౌట్ దశకు చేరుకున్నారు. ఏడో సీడ్ సాత్విక్-చిరాగ్ జోడీ 20-22, 21-14, 21-16తో జపాన్‌కు చెందిన కెన్యా మిత్సుహాషి-హిరోకి ఒకమురా జోడీని ఓడించింది. తొలి గేమ్‌లో తడబడిన సాత్విక్ జోడీ అద్భుతంగా పుంజుకుని ఆ తరువాత వరుసగా రెండు గేమ్‌లు గెలిచి క్వార్టర్స్‌లోకి దూసుకెళ్లింది.
వీరికి నిరాశే !
మహిళల సింగిల్స్ మ్యాచ్‌లో యువ షట్లర్ అనుక్పమ ఉపాధ్యాయ 6-21, 9-21తో ప్రపంచ 11వ ర్యాంకర్ జపాన్‌కు చెందిన టొమోకా మియాజాకి చేతిలో ఓడి టోర్నీ నుంచి నిష్క్రమించింది.
మరోవైపు మహిళల డబుల్స్‌లో ఏడో సీడ్ అశ్విని పొన్నప్ప-తనీషా క్రాస్టో జోడీ 9-21, 21-23 తేడాతో ఫకుషిమా-మత్సుమోటో జపాన్ జోడీపై పోరాడి ఓడారు. ఇంకో మ్యాచ్‌లో అశ్విని భట్‌-శిఖా గౌతమ్‌ జోడీ కూడా ఓటమిపాలైంది.
మిక్స్‌డ్‌ డబుల్స్‌లో ధ్రువ్‌ కపిల-తనీషా క్రాస్టో జోడీ 18-21, 17-21తో జపాన్‌కు చెందిన 8వ సీడ్ మిడొరికవా-నాత్సు సయిటో జంటపై ఓడి ప్రి క్వార్టర్స్‌లోనే టోర్నీ నుంచి నిష్క్రమించింది.