(ప్రభ న్యూస్, ఇబ్రహీంపట్నం) : ఆంధ్రా క్రికెట్ అసోసియేషన్ చరిత్రలో రికార్డు సృష్టించింది. మూలపాడులో జ‌రుగుతున్న సీనియర్ అంత‌ర్ జిల్లాల మ్యాచ్‌లో కేడీసీఏ ప్లేయర్ వై.సందీప్ రికార్డు స్థాయిలో 405 పరుగులు చేశాడు. ఆంధ్రా క్రికెట్ అసోసియేషన్ చరిత్రలో ఇది ఆల్ టైమ్ రికార్డ్. దీంతో ఈ రికార్డు సాధించిన సందీప్‌ను కృష్ణా జిల్లా క్రికెట్ అసోసియేషన్ శనివారం ఘనంగా సన్మానించింది.
ఈ కార్యక్రమంలో విజయవాడ ఎంపీ కేశినేని శివనాథ్ (చిన్ని), నర్సాపురం మాజీ ఎంపీ, ఆంధ్రా క్రికెట్ సంఘం మాజీ కార్యదర్శి గోకరాజు గంగరాజు, ఏసీఏ సంయుక్త కార్యదర్శి ఎ.రాజేష్‌, ఏసీఏ మాజీ కార్యదర్శి అరుణ్‌కుమార్‌ వి.దుర్గాప్రసాద్‌, కేడీసీఏ కార్యదర్శి రవీంద్రచౌదరి తదితరులు పాల్గొన్నారు.