రోహిత్, కోహ్లీ పోరాటం వృథా.. చేజారిన సిరీస్ !

• 27 పరుగుల తేడాతో భారత్ ఓటమి
• టీ20 తర్వాత వన్డే సిరీస్ కూడా సొంతం చేసుకున్న ఇంగ్లండ్
• రోహిత్ సెంచరీ, కోహ్లీ పోరాటం వృథా

లండన్, ఆంధ్రప్రభ : లార్డ్స్ మైదానంలో జరిగిన మూడవ, నిర్ణయాత్మక వన్డేలో భారత్ ఇంగ్లాండ్ చేతిలో 27 పరుగుల తేడాతో ఓటమి పాలైంది. 388 పరుగుల భారీ లక్ష్యాన్ని ఛేదించే క్రమంలో, భారత్ నిర్ణీత 50 ఓవర్లలో 7 వికెట్ల నష్టానికి 360 పరుగులు మాత్రమే చేయగలిగింది. దీంతో మ్యాచ్ తో పాటు సిరీస్ కూడా చేజారింది. ఫ‌లితంగా, మూడు మ్యాచ్‌ల సిరీస్‌ను 2-1తో ఇంగ్లండ్ కైవసం చేసుకుంది. ఇప్పటికే టీ20 సిరీస్‌ను 4-0తో గెలిచిన ఆతిథ్య జట్టు.. వన్డే సిరీస్‌ను కూడా సొంతం చేసుకోవడంతో భారత్ పర్యటన నిరాశాజనకంగా గిసింది.

రోహిత్ విధ్వంసం.. కోహ్లీ పోరాటం.. మిడిల్ ఆర్డర్ వైఫల్యం…..

భారత్ విజయానికి గట్టి పునాది వేసిన రోహిత్ శర్మ 110 బంతుల్లో 138 పరుగులు చేసి అద్భుత ఇన్నింగ్స్ ఆడాడు. అతని ఇన్నింగ్స్‌లో 17 ఫోర్లు, 5 సిక్సర్లు ఉన్నాయి. కెప్టెన్ శుభ్‌మన్ గిల్ అద్భుతమైన అర్ధశతకం (77 పరుగులు) సాధించడంతో పాటు, మొదటి వికెట్‌కు రోహిత్‌తో కలిసి 147 పరుగుల భాగస్వామ్యాన్ని నెలకొల్పాడు.

ఆ తర్వాత, విరాట్ కోహ్లీ తనదైన శైలిలో 60 బంతుల్లో 74 పరుగులు చేసి, భారత్‌ను విజయానికి చేరువగా తీసుకువెళ్లాడు. అతని ఇన్నింగ్స్‌లో నాలుగు ఫోర్లు, మూడు సిక్సర్లు ఉన్నాయి. రోహిత్‌తో కలిసి రెండో వికెట్‌కు 113 పరుగులు జోడిస్తూ.. ఇంగ్లాండ్‌పై ఒత్తిడిని పెంచాడు.

ఇక‌, స్కోరు 260 వద్ద రోహిత్ (138) అవుట్ అయిన తర్వాత, కోహ్లీ మ్యాచ్ బాధ్యతను తన భుజాలపై వేసుకున్నాడు. అయితే, మరోవైపు వరుసగా వికెట్లు పడిపోవడంతో లక్ష్య ఛేదన కష్టంగా మారింది. హాఫ్ సెంచరీ పూర్తి చేసుకుని సెంచరీ దిశగా సాగుతున్న కోహ్లీ 74 పరుగుల వద్ద అవుట్ కావడంతో, భారత్ ఆశలకు గట్టి దెబ్బ తగిలింది.

కోహ్లీకి ముందే ఇషాన్ కిషన్ (14), శ్రేయాస్ అయ్యర్ (0) తమ వికెట్లను కోల్పోయారు. కోహ్లీ అవుట్ అయిన తర్వాత, కేఎల్ రాహుల్ (12), అక్షర్ పటేల్ (2) కూడా తక్కువ స్కోర్లకే వెనుదిరిగారు. దీంతో చేయాల్సిన పరుగుల భారం మరింత పెరిగింది. చివర్లో గుర్నూర్ బ్రార్ (18 నాటౌట్), అర్ష్‌దీప్ సింగ్ (15 నాటౌట్) వేగంగా పరుగులు సాధించినప్పటికీ, ఫలితం లేకుండా పోయింది.

సామ్ కరన్ ధాటికి కుప్పకూలిన‌ భారత్ ..

ఇంగ్లాండ్ బౌలర్లలో సామ్ కరన్ నాలుగు వికెట్లు పడగొట్టి భారత బ్యాటింగ్ లైనప్‌ను దెబ్బతీశాడు. జోఫ్రా ఆర్చర్, ఆదిల్ రషీద్, జాకబ్ బెథెల్ తలో వికెట్ తీసి త‌మ‌ జట్టు విజయాన్ని ఖాయం చేశారు.

ఇంగ్లండ్ తొలి ఇన్నింగ్స్‌లో పరుగుల వరద..

అంత‌క‌ముందు, టాస్ గెలిచి ముందుగా బ్యాటింగ్ చేసిన ఆతిథ్య జట్టు నిర్ణీత 50 ఓవర్లలో 3 వికెట్ల నష్టానికి 387 పరుగులు సాధించింది. ఇంగ్లండ్‌కు ఓపెనర్లు బెన్ డకెట్, జాకబ్ బెతెల్ శుభారంభాన్ని అందించారు. భారత బౌలర్లపై ఎదురుదాడికి దిగిన ఈ జోడీ తొలి వికెట్‌కు 192 పరుగుల భారీ భాగస్వామ్యం నెలకొల్పింది. డకెట్ 135 బంతుల్లో 141 పరుగులు చేసి ఇన్నింగ్స్‌కు అండగా నిలిచాడు. అతని ఇన్నింగ్స్‌లో 18 ఫోర్లు, ఒక సిక్సర్ ఉన్నాయి.

మరోవైపు బెతెల్ 93 బంతుల్లో 91 పరుగులు చేసి సెంచరీకి చేరువలో ఔటయ్యాడు. అతడు 11 ఫోర్లు, 2 సిక్సర్లు బాదాడు. డకెట్ ఔటైన తర్వాత జో రూట్ వేగంగా ఆడుతూ కేవలం 48 బంతుల్లో 74 పరుగులతో నాటౌట్గా నిలిచాడు. చివర్లో వికెట్ కీపర్ జోస్ బట్లర్ కేవలం 13 బంతుల్లో 41 పరుగులు చేసి భారత బౌలర్లపై విరుచుకుపడ్డాడు. అతని ఇన్నింగ్స్‌లో 4 ఫోర్లు, 3 సిక్సర్లు ఉన్నాయి. రూట్-బట్లర్ కలిసి చివరి 20 బంతుల్లోనే 63 పరుగులు జోడించి ఇంగ్లండ్ స్కోరును 387కు చేర్చారు.

97 పరుగులు సమర్పించిన గుర్నూర్ బ్రార్..

భారత బౌలర్లు భారీగా పరుగులు సమర్పించారు. ముఖ్యంగా యువ పేసర్ గుర్నూర్ బ్రార్ అత్యంత ఖరీదైన బౌలర్‌గా నిలిచాడు. తన కోటా 10 ఓవర్లలో 97 పరుగులు ఇచ్చి ఒక్క వికెట్ కూడా తీయలేకపోయాడు. అతని ఎకానమీ 9.70గా నమోదైంది. మరోవైపు ప్రిన్స్ యాదవ్ 10 ఓవర్లలో 79 పరుగులు ఇచ్చి ఒక వికెట్ సాధించగా, అర్ష్‌దీప్ సింగ్ 72 పరుగులు ఇచ్చి వికెట్ దక్కించుకోలేకపోయాడు. ప్రసిద్ధ్ కృష్ణ మాత్రమే రెండు వికెట్లు తీసినా 69 పరుగులు సమర్పించాడు. స్పిన్నర్ అక్షర్ పటేల్ 10 ఓవర్లలో 61 పరుగులు ఇచ్చి అత్యంత పొదుపుగా బౌలింగ్ చేసిన భారత బౌలర్‌గా నిలిచాడు. ఇంగ్లండ్ బ్యాటర్ల దూకుడు, భారత బౌలర్ల పేలవ ప్రదర్శనతో ఆతిథ్య జట్టు నిర్ణీత 50 ఓవర్లలో 3 వికెట్లకు 387 పరుగుల భారీ స్కోరు నమోదు చేసి, ఆ తర్వాత 27 పరుగుల తేడాతో మ్యాచ్‌తో పాటు సిరీస్‌ను కూడా కైవసం చేసుకుంది.

భారత్ పరిగణించాల్సిన అంశాలు…

రోహిత్ శర్మ, విరాట్ కోహ్లీ తిరిగి అద్భుతమైన ఫామ్‌ను అందుకోవడం భారత్‌కు ఖచ్చితంగా సానుకూల అంశం. అయితే, భారీ లక్ష్యాన్ని ఛేదించే క్రమంలో మిడిల్ ఆర్డర్ మరోసారి విఫలం కావడం ఆందోళన కలిగించే విషయం. కీలక మ్యాచ్‌లలో బాధ్యతను భుజాన వేసుకోగలిగే బ్యాటర్ల కొరత టీమ్ ఇండియా ఎదుర్కొంటున్న ప్రధాన సవాలుగా కనిపిస్తోంది. ఇంగ్లాండ్ పర్యటనలో వైట్-బాల్ సిరీస్‌లన్నింటినీ కోల్పోయిన భారత్, ఈ పర్యటన మొత్తంలో కేవలం ఒక్క వన్డే విజయాన్ని మాత్రమే తన ఖాతాలో వేసుకుని స్వదేశానికి తిరిగి రానుంది.