Oracle-Ai-Layoffs-21000-Jobs-Cuts : ఒరాకిల్ ఏఐ షాక్ Andhra Prabha Top Story
Oracle-Ai-Layoffs-21000-Jobs-Cuts : ఒరాకిల్ ఏఐ షాక్ Andhra Prabha Top Story
- మ‌ళ్లీ ఉద్యోగాల కోత
- తెల్లవారుజామునే డిస్మిస్ క‌బురు
- ఇప్పటికే 21 వేల మందికి ఉద్వాసన
- ఏఐ విస్తరణకు భారీగా ఖర్చు
- పునర్‌వ్యవస్థీకరణలో భాగమేనంటున్న సంస్థ
(ఆంద్ర‌ప్ర‌భ, వాషింగ్టన్‌)
ఏఐ ఆధారిత క్లౌడ్‌ వ్యాపారంపై భారీగా పెట్టుబడులు పెడుతున్న ఒరాకిల్.. మరో వైపు ఉద్యోగుల సంఖ్యను తగ్గించే చర్యలకు దిగింది. సంస్థలో తాజాగా మరో విడత ఉద్యోగాల కోతలు ప్రారంభమయ్యాయి. ప్రభావిత ఉద్యోగులకు తెల్లవారుజామునే ఈ-మెయిల్స్‌ పంపి.. వారి పోస్టులను తొలగించినట్లు సంస్థ వెల్లడించింది. విస్తృత స్థాయి సంస్థాగత మార్పుల్లో భాగంగానే ఈ నిర్ణయం తీసుకున్నట్లు పేర్కొంది. ఈ తాజా తొలగింపులపై ముగ్గురు బాధిత ఉద్యోగులతో మాట్లాడినట్లు, అంతర్గతంగా పంపిన సమాచారాన్ని పరిశీలించినట్లు బిజినెస్‌ ఇన్‌సైడర్‌ వెల్లడించింది. ఉద్యోగాలు కోల్పోయిన కొందరు లింక్డ్‌ఇన్‌, రెడిట్‌, బ్లైండ్‌ వేదికలపై తమ ఆవేదనను పంచుకున్నారు.
ఇప్పటికే 21 వేల మందికి ఉద్వాసన
ఒరాకిల్‌లో ఈ ఏడాది ఉద్యోగుల తొలగింపులు ఇదే తొలిసారి కాదు. 2026 మే 31తో ముగిసిన ఆర్థిక సంవత్సరంలో సంస్థ ప్రపంచవ్యాప్తంగా సుమారు 21 వేల మంది ఉద్యోగులను, అంటే దాదాపు 13 శాతం సిబ్బందిని తగ్గించింది. దీంతో ఆర్థిక సంవత్సరం చివరినాటికి సంస్థలో ఉద్యోగుల సంఖ్య సుమారు 1.41 లక్షలకు చేరింది. అంతకుముందు ఏడాది ఈ సంఖ్య సుమారు 1.62 లక్షలుగా ఉంది.
ఉద్యోగుల తొలగింపులు, పునర్‌వ్యవస్థీకరణకు సంబంధించిన పరిహారాలు, ఇతర నిష్క్రమణ వ్యయాల కోసం 2026 ఆర్థిక సంవత్సరంలో ఒరాకిల్ సుమారు 1.84 బిలియన్‌ డాలర్లు ఖర్చు చేసింది. అంతకుముందు ఏడాది ఈ వ్యయం 374 మిలియన్‌ డాలర్లుగా ఉంది. తమ కార్యకలాపాల్లో ఏఐని స్వీకరించడం, అమలు చేయడం కూడా ఉద్యోగుల సంఖ్య తగ్గింపునకు ఒక కారణమని ఒరాకిల్ గతంలో తెలిపింది.
పునర్‌వ్యవస్థీకరణ వ్యయం మరింత పెంపు
ఒరాకిల్ చేపట్టిన పునర్‌వ్యవస్థీకరణ కార్యక్రమం కూడా సంస్థపై భారీ ఆర్థిక భారాన్ని మోపుతోంది. గత వారం వెల్లడించిన వివరాల ప్రకారం.. పునర్‌వ్యవస్థీకరణకు అంచనా వేసిన వ్యయాన్ని మరో 700 మిలియన్‌ డాలర్ల మేర పెంచింది. దీంతో 2026 ఆర్థిక సంవత్సరానికి సంబంధించిన పునర్‌వ్యవస్థీకరణ ప్రణాళిక మొత్తం అంచనా వ్యయం సుమారు 2.8 బిలియన్‌ డాలర్లకు చేరింది. ఉద్యోగుల తొలగింపులకు చెల్లించే పరిహారం, ఒప్పందాల రద్దు రుసుములు, ఇతర నిష్క్రమణ వ్యయాలు ఇందులో ఉన్నాయి. ఆగస్టు 31 నాటికి ఈ ప్రణాళిక కింద సుమారు 2.1 బిలియన్‌ డాలర్ల వ్యయాలను ఇప్పటికే నమోదు చేసినట్లు ఒరాకిల్ తెలిపింది. మరిన్ని చర్యలు చేపట్టాల్సి ఉండటంతో అదనంగా 700 మిలియన్‌ డాలర్లను అంచనా వ్యయంలో చేర్చినట్లు పేర్కొంది. ఈ ప్రకటన వెలువడిన కొద్ది రోజులకే తాజా ఉద్యోగాల కోతలు ప్రారంభం కావడం గమనార్హం.
ఉద్యోగాల కోతపై ముందే అంచనా
సెప్టెంబర్‌లో ప్రారంభమైన తాజా ఉద్యోగాల కోతలు పూర్తిగా అనూహ్యమైనవి కావు. ఏఐ మౌలిక వసతుల విస్తరణ కోసం భారీగా అప్పులు తీసుకుంటున్న ఒరాకిల్.. అదే సమయంలో ఉద్యోగుల వేతన వ్యయాన్ని తగ్గించుకునేందుకు మరో విడత తొలగింపులకు సిద్ధమవుతోందని గత నెలలో ఇండియా టుడే డిజిటల్‌ నివేదించింది. తాజా పరిణామాలతో ఆ ప్రణాళికలో కొంత భాగం అమల్లోకి వచ్చినట్లు స్పష్టమవుతోంది. ఉద్యోగుల పోస్టులను విస్తృత సంస్థాగత మార్పుల్లో భాగంగా తొలగించినట్లు ఈ-మెయిల్‌లో పేర్కొన్నట్లు సమాచారం. అదే రోజు వారి చివరి పని దినంగా కూడా పేర్కొన్నట్లు నివేదికలు చెబుతున్నాయి.
ఏఐపై భారీ బెట్టింగ్‌..
ఒరాకిల్ తాజా వ్యూహంలో ఈ ఉద్యోగాల కోతలు ఓ కీలక అంశాన్ని వెలుగులోకి తెస్తున్నాయి. ఒకవైపు ఏఐ ఆధారిత క్లౌడ్‌ సేవలకు పెరుగుతున్న డిమాండ్‌ను అందిపుచ్చుకునేందుకు సంస్థ భారీగా పెట్టుబడులు పెడుతోంది. మరోవైపు వ్యయాలను నియంత్రించేందుకు ఉద్యోగుల సంఖ్యను తగ్గిస్తోంది. 2027 ఆర్థిక సంవత్సరం తొలి త్రైమాసికంలో ఒరాకిల్ క్యాపిటల్‌ వ్యయం 28.5 బిలియన్‌ డాలర్లకు చేరింది. ఏడాది క్రితం ఇదే కాలంలో ఈ వ్యయం 8.5 బిలియన్‌ డాలర్లు మాత్రమే. అంటే ఏడాది వ్యవధిలో మూడు రెట్లకుపైగా పెరిగింది. పూర్తి ఆర్థిక సంవత్సరానికి క్యాపిటల్‌ వ్యయం 90 నుంచి 95 బిలియన్‌ డాలర్ల మధ్య ఉంటుందని సంస్థ అంచనా వేసింది. ఏఐ వ్యాపారంలో మాత్రం డిమాండ్ బలంగా ఉందని ఒరాకిల్ చెబుతోంది. త్రైమాసికంలో అదనంగా 30 బిలియన్‌ డాలర్లకు పైగా ఏఐ క్లౌడ్‌ ఒప్పందాలు కుదుర్చుకున్నట్లు సంస్థ వెల్లడించింది. దీంతో భవిష్యత్తులో అందుకోవాల్సిన ఆదాయానికి సంబంధించిన మొత్తం బకాయి ఒప్పందాల విలువ, అంటే రెవెన్యూ బ్యాక్‌లాగ్‌, 664 బిలియన్‌ డాలర్లకు చేరింది. ఈ విస్తరణకు భారీగా ఖర్చవుతోంది. త్రైమాసికంలో ఒరాకిల్ 5.4 బిలియన్‌ డాలర్ల ప్రతికూల ఫ్రీ క్యాష్‌ ఫ్లోను నమోదు చేసింది. డేటా సెంటర్లపై వ్యయం కూడా నిరంతరం పెరుగుతోంది.
పెరుగుతున్న ఏఐ డిమాండ్
ఒరాకిల్ తాజా గణాంకాలు ఈ రెండు విభిన్న ధోరణులను ఒకేసారి చూపిస్తున్నాయి. 2027 ఆర్థిక సంవత్సరం తొలి త్రైమాసికంలో కంపెనీ ఆదాయం ఏడాది ప్రాతిపదికన 30 శాతం పెరిగి 19.3 బిలియన్‌ డాలర్లకు చేరింది. క్లౌడ్‌ ఇన్‌ఫ్రాస్ట్రక్చర్‌ ఆదాయం ఏకంగా 121 శాతం పెరిగి 7.4 బిలియన్‌ డాలర్లకు చేరింది. అంటే ఏఐ, క్లౌడ్‌ రంగాల్లో అవకాశాలు భారీగా పెరుగుతున్నప్పటికీ.. వాటిని అందిపుచ్చుకునేందుకు అవసరమైన డేటా సెంటర్లు, మౌలిక వసతులపై సంస్థ చేస్తున్న వ్యయం కూడా అదే స్థాయిలో పెరుగుతోంది. దీంతో ఒకవైపు భారీ పెట్టుబడులు పెడుతూ.. మరోవైపు నిర్వహణ వ్యయాలను తగ్గించుకునే ప్రయత్నంలో భాగంగా ఉద్యోగాల కోతలు కొనసాగుతున్నాయి.
ఉద్యోగుల పరంగా చూస్తే.. ఒరాకిల్‌లో ఈ ఏడాది చోటుచేసుకున్న భారీ మార్పుల్లో తాజా తొలగింపులు మరో అధ్యాయం మాత్రమే. సంస్థ దృష్టిలో మాత్రం ఇది మరింత పెద్ద పునర్‌వ్యవస్థీకరణలో భాగం. భారీగా పెరుగుతున్న ఏఐ మౌలిక వసతుల విస్తరణకు నిధులు సమకూర్చుకుంటూనే.. ఖర్చులను అదుపులో ఉంచుకోవడమే ఈ చర్యల ప్రధాన ఉద్దేశంగా కనిపిస్తోంది.
