ఆపరేషన్ సేఫ్ క్యాంపస్…
ఈగల్ సెల్ అధికారులు సంయుక్తంగా విద్యాసంస్థల వద్ద తనిఖీలు
నిషేధిత వస్తువులు విక్రయిస్తున్న 4 దుకాణాల యజమానులకు జరిమానాలు
అనంతపురం ప్రతినిధి, సెప్టెంబర్ 3(ఆంధ్రప్రభ) : విద్యాసంస్థల పరిసరాల్లో అక్రమ వ్యాపారాలు, అసాంఘీక కార్యకలాపాల అడ్డుకట్టే లక్ష్యంగా జిల్లా ఎస్పీ పి.జగదీష్ ఆదేశాల మేరకు అనంతపురం మూడో పట్టణ పోలీసులు, ఈగల్ సెల్ అధికారులు ఈరోజు ‘ఆపరేషన్ సేఫ్ క్యాంపస్ జోన్’ పేరుతో విస్తృత తనిఖీలు చేపట్టారు.
నగరంలోని 4వ రోడ్డు ప్రాంతంలో ఉన్న నేతాజీ హైస్కూల్, పీఆర్కే జూనియర్ కాలేజీ, సన్షైన్ హైస్కూల్ తదితర విద్యాసంస్థల చుట్టూ 500 మీటర్ల పరిధిలోని 6 కిరాణా దుకాణాలను పోలీసులు ఆకస్మికంగా తనిఖీ చేశారు. ఈ క్రమంలో నిబంధనలకు విరుద్ధంగా విద్యార్థులు, యువతను లక్ష్యంగా చేసుకుని నిషేధిత వస్తువులు విక్రయిస్తున్న 4 దుకాణాల యజమానులకు జరిమానా విధించారు.
విద్యాసంస్థల పరిసరాల్లో చట్టవ్యతిరేక కార్యకలాపాలకు పాల్పడితే కఠిన చర్యలు తప్పవని ఈ సందర్భంగా పోలీసులు హెచ్చరించారు. ఈ తనిఖీల్లో అనంతపురం మూడో పట్టణ పోలీస్ స్టేషన్ సిబ్బంది, జిల్లా ‘ఈగల్ సెల్’ ఎస్సై హనుమంతు ఆధ్వర్యంలో బృందం పాల్గొన్నారు.
