North-Korea-Ballistic-Missile-Test: క్షిపణి వీరంగం ..Andhra Prabha Top News
North-Korea-Ballistic-Missile-Test : క్షిపణి వీరంగం ..Andhra Prabha Top News
- కొరియా ద్వీపకల్పంలో మ‌ళ్లీ ఉద్రిక్త‌త
- ఉత్తర కొరియా మిసైల్ టెస్ట్‌
- దక్షిణ కొరియా తీరంవైపు బాలిస్టిక్‌ మిసైల్
- 700 కి.మీ.కు పైగా ప్రయాణం
- సియోల్ అప్రమత్తం
- అమెరికా, జపాన్‌తో నిఘా సమాచారం
( సియోల్ , ఆంధ్ర‌ప్ర‌భ )
కొరియా ద్వీపకల్పంలో మరోసారి ఉద్రిక్తతలు పెరిగాయి. ఉత్తర కొరియా శనివారం తూర్పు తీరంలోని వోన్సాన్‌ నౌకాశ్రయ నగరం నుంచి బాలిస్టిక్‌ క్షిపణిని ప్రయోగించింది. ఈ క్షిపణి సముద్రం వైపు దూసుకెళ్లి 700 కిలోమీటర్లకు పైగా ప్రయాణించినట్లు దక్షిణ కొరియా జాయింట్‌ చీఫ్స్‌ ఆఫ్‌ స్టాఫ్‌ (JCS) వెల్లడించింది. ప్రయోగాన్ని గుర్తించిన వెంటనే దక్షిణ కొరియా సైన్యం అప్రమత్తమై.. మరిన్ని క్షిపణి ప్రయోగాలు జరిగే అవకాశం ఉందని హెచ్చరించింది.
అత్యవసర సమావేశం
క్షిపణి ప్రయోగం నేపథ్యంలో దక్షిణ కొరియా అధ్యక్ష కార్యాలయంలో జాతీయ భద్రతా వ్యవహారాల అత్యవసర సమావేశం జరిగింది. పరిస్థితిని సమీక్షించిన అధికారులు.. ఉత్తర కొరియా కదలికలపై నిశితంగా నిఘా ఉంచాలని నిర్ణయించారు. అమెరికా, జపాన్‌తో కూడా సంబంధిత నిఘా సమాచారాన్ని పంచుకుంటున్నట్లు దక్షిణ కొరియా సైన్యం తెలిపింది.జపాన్‌ కూడా వెంటనే అప్రమత్తమైంది. ఉత్తర కొరియా అనుమానిత బాలిస్టిక్‌ క్షిపణిని ప్రయోగించిందంటూ అత్యవసర హెచ్చరికను జారీ చేసింది.
అమెరికా స్పందన ఇదీ..
క్షిపణి ప్రయోగంపై అమెరికా పసిఫిక్‌ కమాండ్‌ కూడా స్పందించింది. ప్రయోగం గురించి తమకు సమాచారం ఉందని పేర్కొంటూ.. అమెరికా మిత్రదేశాలు, భాగస్వామ్య దేశాలతో సన్నిహితంగా సంప్రదింపులు జరుపుతున్నట్లు తెలిపింది. ప్రస్తుత అంచనాల ప్రకారం ఈ ప్రయోగం అమెరికా సిబ్బంది, అమెరికా భూభాగం లేదా మిత్రదేశాలకు తక్షణ ముప్పుగా కనిపించడం లేదని అమెరికా పసిఫిక్‌ కమాండ్‌ వెల్లడించింది.
కిమ్‌ యో జోంగ్‌ వ్యాఖ్యల మరుసటి రోజే..
ఈ క్షిపణి ప్రయోగానికి ముందు రోజు ఉత్తర కొరియా నాయకుడు కిమ్‌ జోంగ్‌ ఉన్‌ సోదరి కిమ్‌ యో జోంగ్‌ దక్షిణ కొరియాపై తీవ్ర వ్యాఖ్యలు చేశారు. సరిహద్దు ప్రాంతంలో భూగర్భ మందుపాతరల పేలుళ్లకు ఉత్తర కొరియా క్షమాపణ చెప్పాలని దక్షిణ కొరియా చేసిన డిమాండ్‌ను ఆమె తీవ్రంగా కొట్టిపారేశారు. ఉత్తర కొరియా మందుపాతరలను సైనిక నియంత్రణ రేఖకు దక్షిణంగా ఏర్పాటు చేసిందని దక్షిణ కొరియా, అమెరికా నేతృత్వంలోని ఐక్యరాజ్యసమితి కమాండ్‌ ఆరోపించాయి. వాటి పేలుళ్లలో సరిహద్దు ప్రాంతంలో నిఘా విధులు నిర్వహిస్తున్న ముగ్గురు దక్షిణ కొరియా సైనికులు తీవ్రంగా గాయపడ్డారు.
సరిహద్దులోనూ కట్టుదిట్టం
ఉత్తర కొరియా సరిహద్దును మరింత బలోపేతం చేసే చర్యలను నిలిపివేయాలని కూడా దక్షిణ కొరియా కోరుతోంది. ఇందులో భాగంగా మందుపాతరలు ఏర్పాటు చేయడం, యాంటీ ట్యాంక్‌ అడ్డంకులు నిర్మించడం వంటి చర్యలను ఆపాలని సియోల్ డిమాండ్‌ చేసింది.అయితే ఈ డిమాండ్లను కిమ్‌ యో జోంగ్‌ తీవ్రంగా విమర్శించారు. దక్షిణ కొరియాతో సంబంధాలను శాశ్వతంగా తెంచుకునే దిశగా ఉత్తర కొరియా ముందుకు సాగుతోందని ఆమె స్పష్టం చేశారు.
వరుసగా సైనిక ప్రదర్శనలు
ఇటీవలి వారాల్లో ఉత్తర కొరియా వరుస సైనిక కార్యకలాపాలతో తన సామర్థ్యాన్ని ప్రదర్శిస్తోంది. హైపర్‌సోనిక్‌ క్షిపణి వ్యవస్థగా పేర్కొంటున్న ఆయుధ పరీక్షలు, ప్రత్యక్ష కాల్పుల విన్యాసాలు, కొత్త యుద్ధనౌకను సైన్యంలోకి చేర్చడం వంటి పరిణామాలు చోటుచేసుకున్నాయి.ఈ నేపథ్యంలో తాజాగా జరిగిన బాలిస్టిక్‌ క్షిపణి ప్రయోగం.. కొరియా ద్వీపకల్పంలో సైనిక ఉద్రిక్తతలు కొనసాగుతున్నాయనే సంకేతాలను ఇస్తోంది.
