Sensex | మార్కెట్లకు నష్టాల సెగ..!
మార్కెట్లకు మళ్లీ నష్టాలే..
చమురు ధరల పెరుగుదల..
విదేశీ పెట్టుబడుల ఉపసంహరణతో సూచీలపై ఒత్తిడి
Sensex | ఆంధ్రప్రభ, వెబ్ డెస్క్ : వారాంతంలో దేశీయ ఈక్విటీ మార్కెట్లు నష్టాలతో ముగిశాయి. అంతర్జాతీయ మార్కెట్లలో ప్రతికూల సంకేతాలు, పశ్చిమాసియా ఉద్రిక్తతల నేపథ్యంలో ముడిచమురు ధరలు భారీగా పెరగడం, విదేశీ పెట్టుబడిదారులు నిధులను వెనక్కి తీసుకోవడం దేశీయ మార్కెట్లపై తీవ్ర ప్రభావం చూపాయి. దీంతో ఉదయం నుంచి ఒత్తిడిలో కొనసాగిన బెంచ్మార్క్ సూచీలు చివరకు నష్టాలతో స్థిరపడ్డాయి.
బీఎస్ఈ సెన్సెక్స్ 120.84 పాయింట్లు నష్టపోయి 74,781.76 వద్ద ముగిసింది. మరోవైపు ఎన్ఎస్ఈ నిఫ్టీ 79.70 పాయింట్లు కోల్పోయి 23,398.10 వద్ద స్థిరపడింది. సెన్సెక్స్ 0.16 శాతం, నిఫ్టీ 0.34 శాతం చొప్పున క్షీణించాయి.
పశ్చిమాసియాలో కొనసాగుతున్న ఉద్రిక్తతలు ముడిచమురు మార్కెట్పై ప్రభావం చూపుతున్నాయి. దీంతో బ్రెంట్ క్రూడ్ ధర బ్యారెల్కు 108 డాలర్లకు పైగా చేరడం ఇన్వెస్టర్లలో ఆందోళనకు కారణమైంది. చమురు ధరలు మరింత పెరిగితే ద్రవ్యోల్బణం, దిగుమతి వ్యయాలు పెరిగే అవకాశం ఉండటంతో దేశీయ ఆర్థిక వ్యవస్థపై ప్రభావం పడుతుందనే భయాలు మార్కెట్ సెంటిమెంట్ను దెబ్బతీశాయి.
అంతర్జాతీయంగా అమెరికా, ఆసియా మార్కెట్లు ప్రతికూల ధోరణిలో కొనసాగడం కూడా భారత మార్కెట్లపై ఒత్తిడిని పెంచింది. దీనికి తోడు విదేశీ సంస్థాగత పెట్టుబడిదారుల నిధుల ఉపసంహరణతో సూచీలు కోలుకోలేకపోయాయి.
రంగాల వారీగా చూస్తే మెటల్, రియాల్టీ, ప్రభుత్వ రంగ బ్యాంకుల షేర్లు ఎక్కువగా నష్టపోయాయి. అయితే ఐటీ, టెక్ రంగాల షేర్లు స్వల్పంగా లాభాల్లో కొనసాగి మార్కెట్ల పతనాన్ని కొంతమేర అడ్డుకున్నాయి. మొత్తంగా చమురు ధరల పెరుగుదల, అంతర్జాతీయ ప్రతికూల సంకేతాలు, విదేశీ నిధుల తరలింపుతో వారాంతంలో దేశీయ మార్కెట్లు నష్టాలతో ముగిశాయి.
