Lamakaan | సినిమా ముచ్చట్లు.. సాహిత్య చర్చలు.. ‘లమకాన్’ స్పెషాలిటీ ఇదే!
Lamakaan | సినిమా ముచ్చట్లు.. సాహిత్య చర్చలు.. ‘లమకాన్’ స్పెషాలిటీ ఇదే!
Lamakaan | బంజారాహిల్స్లో బడ్జెట్ అడ్డా
చాయ్.. సినిమా.. సాహిత్యం
హైదరాబాద్ కల్చర్ స్పాట్
Lamakaan | ఆంధ్రప్రభ, వెబ్డెస్క్: హైదరాబాద్లో బంజారాహిల్స్ అంటేనే ఖరీదైన కేఫ్లు, కార్పొరేట్ హోటళ్లు గుర్తొస్తాయి. పర్స్ ఖాళీ అవ్వకుండా అక్కడ కాసేపు ప్రశాంతంగా గడపడం అసాధ్యమని చాలామంది అనుకుంటారు. కానీ, అదే బంజారాహిల్స్ రోడ్ నంబర్ 1లోని ఒక చిన్న సందులోకి వెళ్తే.. పచ్చని చెట్ల మధ్య, మట్టి వాసనల నడుమ ఒక సరికొత్త లోకం కనిపిస్తుంది. అదే ‘లమకాన్’.
కేవలం పది రూపాయలకే చాయ్, పాకెట్ మనీతోనే కడుపు నిండే బిర్యానీ, సమోసాలు.. వీటన్నింటికీ మించి అపరిమితమైన సినిమా ముచ్చట్లు, సాహిత్య చర్చలు, సంగీత సందడి లమకాన్ ప్రత్యేకత. కథలు వింటూ కాలాన్ని మరిచిపోవాలనుకునే వారికి, సంగీతాన్ని ఆస్వాదిస్తూ ప్రశాంతత పొందాలనుకునే వారికి, సాహిత్యాన్ని చదువుతూ లోకాన్ని తెలుసుకోవాలనుకునే వారికి లమకాన్ ఒక అదిరిపోయే అడ్డా అనడంలో సందేహం లేదు.
జేబుకు చిల్లు పడకుండా రుచికరమైన ఫుడ్
లమకాన్లో ఫుడ్ మెనూ చాలా సింపుల్గా ఉంటుంది. కానీ రుచి మాత్రం అమోఘం. ఇక్కడి రేట్లు చూస్తే బంజారాహిల్స్లోనే ఉన్నామా అనే అనుమానం రాక మానదు. ఇక్కడి ఇరానీ చాయ్, సులేమాని చాయ్, నిమ్మరసం చాలా ఫేమస్. కేవలం రూ.10 నుంచి రూ.20 లోపే ఇవి లభిస్తాయి.
వేడివేడి సమోసాలు, మిర్చి బజ్జీలు, లుక్మీ వంటి హైదరాబాదీ స్నాక్స్ ఇక్కడ హాట్ కేకుల్లా అమ్ముడవుతాయి. మధ్యాహ్నం, రాత్రి వేళల్లో లభించే చికెన్ బిర్యానీ, ఖీమా రోటీ, కట్టీ దాల్, వైట్ రైస్ వంటి వంటకాలు ఇంటి వంటను తలపిస్తాయి. క్వాలిటీ విషయంలో ఎక్కడా రాజీ పడకపోవడం లమకాన్కు ఉన్న ప్రత్యేకత.
సినిమా ముచ్చట్లు.. కళాకారుల అడ్డా
లమకాన్ అంటే కేవలం తినేసి వెళ్లిపోయే రెస్టారెంట్ కాదు. ఇదొక ఓపెన్ కల్చరల్ స్పేస్. హైదరాబాద్లోని లఘు చిత్ర దర్శకులు, థియేటర్ ఆర్టిస్టులు, ఐటీ ఉద్యోగులు, విద్యార్థులు, మేధావులు ఇక్కడికి రెగ్యులర్గా వస్తుంటారు.
ఓ మూలన కూర్చుని ఎవరైనా స్క్రిప్ట్ డిస్కషన్స్ చేసుకుంటూ కనిపిస్తారు. మరోవైపు గిటార్ పట్టుకుని కొత్త ట్యూన్స్ కడుతుంటారు. ఇక్కడి చిన్న ఓపెన్ ఆడిటోరియంలో నాటకాలు, డాక్యుమెంటరీల స్క్రీనింగ్లు, స్టాండప్ కామెడీ షోలు, పుస్తకావిష్కరణలు నిరంతరం జరుగుతూనే ఉంటాయి.
ల్యాప్టాప్ పట్టుకుని అలా వాలిపోవచ్చు
లమకాన్లో ఉచిత వైఫై సదుపాయం ఉంటుంది. ఎలాంటి హడావుడి లేకుండా, కేవలం ఒక చాయ్ ఆర్డర్ ఇచ్చి గంటల తరబడి ల్యాప్టాప్తో పని చేసుకోవచ్చు. ఎవరూ త్వరగా లేవమని అడగరు. ఇక్కడి పచ్చదనం, ప్రశాంతమైన వాతావరణం ఒత్తిడిని దూరం చేస్తాయి.
ఇక్కడ పూర్తిగా ప్లాస్టిక్ నిషేధం అమల్లో ఉంటుంది. హైదరాబాద్ సంస్కృతిని, రుచులను చాలా తక్కువ బడ్జెట్లో ఆస్వాదించాలనుకునే వారికి ‘లమకాన్’ ఒక పర్ఫెక్ట్ ఛాయిస్. మీరు ఇంకా వెళ్లకపోతే ఈ వీకెండ్లో అక్కడ వాలిపోవచ్చు.
సందర్శించే వారు గుర్తుంచుకోవాల్సిన విషయాలు
లమకాన్ ఉదయం 10 గంటల నుంచి రాత్రి 10 గంటల వరకు తెరిచి ఉంటుంది. సోమవారం సెలవు. ఇక్కడ సెల్ఫ్ సర్వీస్ విధానం ఉంటుంది. ఫుడ్ కౌంటర్ దగ్గరకు వెళ్లి మనమే ఆర్డర్ ఇచ్చి, టోకెన్ తీసుకోవాలి.
CLICK HERE TO READ Nala Jamtara Cashew Nuts Price | కిలో కాజు రూ.30కే.. ఇది నిజమేనా?
