- చిత్తూరు కలెక్టర్ సుమిత్ కుమార్
- ఏపీఐఐసీ ఇండస్ట్రియల్ పార్ట్‌నర్‌షిప్ డ్రైవ్ పోస్ట‌ర్ ఆవిష్క‌ర‌ణ
చిత్తూరు, ఆంధ్ర‌ప్ర‌భ : పరిశ్రమల అభివృద్ధితో పాటు ప‌ర్యావ‌ర‌ణాన్ని ప‌రిర‌క్షించాల‌ని చిత్తూరు కలెక్టర్ సుమిత్ కుమార్ కోరారు. పరిశ్రమల ఆధునీక‌ర‌ణ‌తో పాటు శుభ్రత కార్యక్రమాలను ప్రోత్సహించే దిశగా ఏపీఐఐసీ ఇండస్ట్రియల్ పార్ట్‌నర్‌షిప్ డ్రైవ్ విస్తృత కార్యక్రమాలు ప్రారంభిస్తున్న‌ట్లు కలెక్టర్ తెలిపారు. ఈ మేర‌కు బుధ‌వారం త‌న ఛాంబ‌ర్‌లో ఇండస్ట్రియల్ పార్ట్‌నర్‌షిప్ డ్రైవ్ పోస్టర్‌ను కలెక్టర్ విడుదల చేసి మాట్లాడారు. పరిశ్రమల వృద్ధితో పాటు పర్యావరణ పరిరక్షణ కూడా సమానంగా ముందుకు సాగాలన్నారు.
ఇందులో భాగంగా జిల్లా పరిధిలో పరిశ్రమల ఆధునికీకరణ, పర్యావరణ పరిరక్షణ, పరిశ్రమల అభివృద్ధి, శుభ్రత కార్యక్రమాలను ప్రోత్సహించే దిశగా ఇండస్ట్రియల్ పార్ట్‌నర్‌షిప్ డ్రైవ్ ను అక్టోబర్ 15 నుంచి నవంబర్ 15 వరకు నిర్వహిస్తున్న‌ట్లు తెలిపారు. జిల్లా వ్యాప్తంగా పరిశ్రమల అభివృద్ధి, పర్యావరణ పరిరక్షణ, శుభ్రమైన పారిశ్రామిక వాడలు స్థాపన, పెట్టుబడిదారుల సహకారం ద్వారా పరిశ్రమల వృద్ధి లక్ష్యంగా ఈ కార్యక్రమాలు నిర్వహిస్తామన్నారు. పరిశ్రమల అభివృద్ధి ద్వారా యువతకు ఉపాధి అవకాశాలు పెరుగుతాయని తెలిపారు. కార్యక్రమంలో ఏపీఐఐసి చిత్తూరు జోనల్ మేనేజర్ వైవికె సుబ్బారావు, డిస్ట్రిక్ట్ ఇండస్ట్రీస్ సెంటర్ జనరల్ మేనేజర్ సూరిబాబు, పారిశ్రామికవేత్త సురేష్ బాబు తదితరులు పాల్గొన్నారు.
