ఇంగ్లాండ్‌తో జరుగుతున్న తొలి టెస్ట్ మూడో రోజు ఉత్కంఠతో సాగింది. ఆట ముగిసే సమయానికి భారత్ స్వల్పంగా పైచేయిగా నిలిచింది. రెండో ఇన్నింగ్స్‌లో భారత్ 90/2 స్కోరుతో నిలిచింది. ఫలితంగా ఇప్పటివరకు భారత్‌కు మొత్తం 96 పరుగుల ఆధిక్యం దక్కింది.
మూడో రోజు ఉదయం ఇంగ్లాండ్ తన తొలి ఇన్నింగ్స్‌ను 209/3 వద్ద పునఃప్రారంభించింది. ఓల్లీ పోప్ (106) అద్భుత సెంచరీ సాధించగా, హ్యారీ బ్రూక్ (99) కేవలం ఒక్క పరుగు తేడాతో సెంచరీని కోల్పోయాడు. మిడిలార్డర్‌లో జేమీ స్మిత్ (40), క్రిస్ వోక్స్ (38), బ్రైడన్ కార్స్ (22), జోష్ టంగ్ (11) కీలక భాగస్వామ్యాలు నమోదు చేశారు.
అయితే, భార‌త బౌల‌ర్ల‌లో జస్ప్రీత్ బుమ్రా అద్భుతంగా ఫైఫ‌ర్ సాధించాడు. 27 ఓవర్లలో 83 పరుగులు ఇచ్చి ఐదు వికెట్లు తీసి ఇన్నింగ్స్ ఇన్నింగ్స్ ముగించాడు. ఫలితంగా ఇంగ్లాండ్ తొలి ఇన్నింగ్స్ 465 పరుగులకు ఆల్ అవుట్ అయింది.
భారత్ రెండో ఇన్నింగ్స్‌లో ఓపెనింగ్ తీవ్రంగా తడబాటుకు గురైంది. తొలి ఇన్నింగ్స్‌లో సెంచరీ కొట్టిన యశస్వి జైస్వాల్ కేవలం నాలుగు పరుగులకే వెనుదిరిగాడు. తొలి టెస్టు లో డ‌కౌట్ అయిన సాయిసుదర్శన్ 30 పరుగుల వద్ద క్యాచ్ ఇచ్చి వెనుదిరిగాడు. కేఎల్ రాహుల్ మరోసారి నిల‌దొక్కుకుని 75 బంతుల్లో 47 పరుగులతో క్రీజులో నిలిచాడు. అతనికి తోడుగా కెప్టెన్ శుభ్మన్ గిల్(7) క్రీజులో ఉన్నాడు.
అయితే సాయంత్రం వర్షం ఆటంకం క‌లిగించ‌డంతో మ్యాచ్ నిలిచిపోయింది. దీంతో అంపైర్లు స్టంప్స్ ప్రకటించారు. ప్రస్తుత పరిస్థితుల్లో మ్యాచ్ పూర్తిగా సమంగా ఉంది. భారత్ మెరుగైన బ్యాటింగ్ చేస్తే ఇంగ్లాండ్‌కు భారీ లక్ష్యం పెట్టే అవకాశం ఉంది. అదే సమయంలో ఇంగ్లాండ్ తమ బౌలింగ్‌తో భారత్‌ను త్వరగా ఔట్ చేసి మ్యాచ్‌ను తమ వైపు తిప్పుకోవాల‌ని చూస్తోంది. ఈ నేపథ్యంలో చివరి రెండు రోజులు మ్యాచ్ ఫలితాన్ని నిర్ణయించబోయే కీలక దశలు కానున్నాయి.
