టెట్ రద్దు పోరులో.. కదిరి యూటీఎఫ్ నేతల అరెస్ట్..

విజయవాడ విద్యాభవన్ వద్ద అహింసాయుత నిరసన

శ్రీ సత్యసాయి బ్యూరో, సెప్టెంబర్ 3 (ఆంధ్రప్రభ): ఉపాధ్యాయులకు తప్పనిసరిగా నిర్వహిస్తున్న టెట్‌ను రద్దు చేయాలని డిమాండ్ చేస్తూ యూటీఎఫ్ ఆధ్వర్యంలో విజయవాడ విద్యాభవన్ వద్ద చేపట్టిన అహింసాయుత పోరాటంలో పాల్గొన్న కదిరి ప్రాంత యూటీఎఫ్ నాయకులను పోలీసులు అరెస్ట్ చేసినట్లు సంఘం నాయకులు తెలిపారు.

టెట్ రద్దు కోసం రాష్ట్రవ్యాప్తంగా ఉపాధ్యాయ సంఘాలు ఆందోళన కార్యక్రమాలు నిర్వహిస్తున్న నేపథ్యంలో, యూటీఎఫ్ పిలుపు మేరకు పలువురు ఉపాధ్యాయులు విజయవాడలోని విద్యాభవన్ వద్ద నిరసనకు దిగారు. ఈ సందర్భంగా కదిరి ప్రాంతానికి చెందిన యూటీఎఫ్ నాయకులు డి. శ్రీనివాసులు, చెన్నూరు తాహెర్ వలి, బ్రహ్మేంద్ర, ఖాదర్ బాషా, నారాయణరెడ్డి, రామకృష్ణ తదితరులు పోరాటంలో పాల్గొన్నారు.

శాంతియుతంగా, అహింసా మార్గంలో తమ నిరసనను వ్యక్తం చేస్తున్న నాయకులను పోలీసులు అదుపులోకి తీసుకున్నారని యూటీఎఫ్ వర్గాలు ఆరోపించాయి. ఉపాధ్యాయుల న్యాయమైన డిమాండ్లను పరిష్కరించాల్సిన ప్రభుత్వం, పోరాటాలను అణిచివేసే ధోరణి అవలంబించడం సరికాదని వారు విమర్శించారు.

టెట్ విధానంపై ఉపాధ్యాయుల్లో నెలకొన్న ఆందోళనను ప్రభుత్వం వెంటనే పరిగణనలోకి తీసుకుని, సంబంధిత సమస్యలకు పరిష్కారం చూపాలని యూటీఎఫ్ నాయకులు డిమాండ్ చేశారు. అరెస్టులతో ఉద్యమాన్ని అణచివేయలేరని, తమ న్యాయమైన డిమాండ్ల సాధన కోసం పోరాటాన్ని మరింత ఉధృతం చేస్తామని స్పష్టం చేశారు. కదిరి ప్రాంత యూటీఎఫ్ నాయకుల అరెస్టు వార్త స్థానిక ఉపాధ్యాయ వర్గాల్లో చర్చనీయాంశంగా మారింది.