వాట్సాప్ స్టేటస్ కూడా ఓ రకమైన సమాచార వ్యాప్తి వ్యవస్థే అని బాంబే హైకోర్టు నాగ్ పూర్ బెంచ్ తెలిపింది. ఓ వర్గానికి వ్యతిరేకంగా ద్వేషపూరిత వ్యాఖ్యలతో స్టేటస్ పోస్ట్ చేసిన ఒక వ్యక్తిపై నమోదైన ఎస్సీ, ఎస్టీ అట్రాసిటీ కేసును కొట్టివేసేందుకు నిరాకరించింది. ఈ ఏడాది మార్చిలో మహారాష్ట్రకు చెందిన కిశోర్ లాండ్కర్ అనే వ్యక్తి వాట్సాప్ స్టేటస్ లో ఓ ప్రశ్న వేస్తూ… అందుకు సమాధానాన్ని గూగుల్ లో వెతకాలని కోరాడు.
అందులో ఊహించని నిజాలు తెలుస్తాయని పేర్కొన్నాడు. ఆయన చెప్పిన విధంగానే గూగుల్ లో వెతికిన ఓ వ్యక్తికి అభ్యంతరకర వీడియోలు కనిపించాయి. అవి కొన్ని వర్గాల ప్రజల మనోభావాలు దెబ్బతీసేలా ఉన్నాయని ఓ వ్యక్తి పోలీసులకు ఫిర్యాదు చేశాడు. దీంతో కిశోర్ పై కేసులు నమోదయ్యాయి.
వాట్సప్ స్టేటస్ ఆధారంగా తనపై అట్రాసిటీ కేసును నమోదు చేయడాన్ని సవాల్ చేస్తూ కిషోర్ బాంబే హైకోర్టులో అప్పీల్ చేశాడు. ఈ పిటిషన్ ను విచారించిన కోర్టు తీర్పును వెల్లడించింది. పరిచయస్తులకు ఏదైనా చెప్పాలని భావించినప్పుడే సాధారణంగా వాట్సాప్ స్టేటస్ పెడుతుంటారని తెలిపింది. పౌరులు పెట్టే వాట్సప్ స్టేటస్ లు బాధ్యతా యుతంగా ఉండాలని విద్వేషాన్ని వ్యాప్తి చేసేలా ఉండకూడదని వ్యాఖ్యానించింది.