హైదరాబాద్‌, ఆంధ్రప్రభ : సికింద్రాబాద్‌ నుంచి తిరుపతి నడిచే వందేభారత్‌ రైలు రూట్‌ ఖరారైంది. ఈ రైలును బీబీనగర్‌-నడికుడి మార్గంలో మిర్యాలగూడ మీదుగా నడపాలని రైల్వే శాఖ అధికారులు నిర్ణయించినట్లు సమాచారం. ముందుగా ఈ రైలును వరంగల్‌-ఖాజీపేట మార్గంలో నడపాలని రైల్వే అధికారులు భావించినప్పటికీ ఈ మార్గంలో దూరం ఎక్కువ అవుతున్నందున దాని బదులు బీబీనగర్‌-నడికుడి మార్గంలో నడపాలని నిర్ణయించారు. కాగా, ఇప్పటికే బీబీనగర్‌ నుంచి గుంటూరు వరకు ఉన్న రైల్వే మార్గంలో ట్రాక్‌లను ఆధునీకరించి గంటకు 130 కి.మీ.ల వేగంతో ప్రయాణించేలా ఏర్పాటు చేశారు. ప్రస్తుతం ఈ మార్గంలో తిరుపతికి వెళుతున్న నారాయణాద్రి ఎక్స్‌ప్రెస్‌ 664 కి.మీ.ల దూరాన్ని 12.30 గంటల సమయంలో చేరుకుంటుంది.
ఈ రూట్‌లో సాధారణ ప్రయాణికులతో పాటు వర్తక, వాణిజ్యాలు చేసే వారికి సైతం సౌకర్యంగాఉంది. వందేభారత్‌ రైలును ఈ మార్గంలో నడపడం ద్వారా దూరంతో పాటు సమయం కూడా తగ్గించాలని రైల్వే అధికారులు భావిస్తున్నారు. దీంతో ఈ రైలుకు ఆదరణ పెరుగుతుందని పేర్కొంటున్నారు. అయితే, సికింద్రాబాద్‌ తిరుపతి మధ్య వందేభారత్‌ రైలును ప్రారంభించే విషయంపై ఇంకా స్పష్టత రాలేదు. రైల్వే బోర్డు నుంచి అధికారిక సమాచారం రాగానే, రైలు ప్రారంభానికి తగిన ఏర్పాట్లు చేస్తామని రైల్వే అధికారులు తెలిపారు.