హైదరాబాద్‌, ఆంధ్రప్రభ : తెలంగాణలో రియల్‌ ఎస్టేట్‌ రంగంపై పలు రంగాలు ప్రభావం చూపుతున్నాయి. ఏపీలో కొత్తగా టీడీపీ సర్కార్‌ అధికారంలోకి రావడంతో మళ్లి విజయవాడవైపుగా పెట్టుబడులు తరలుతుండగా, దీనికి విరుగుడుగా హైడ్రా ఇస్తున్న భరోసా వ్యాపారులను ఆకర్శిస్తోంది.
డిసెంబర్‌ నుంచి అమరావతి పనులు ప్రారంభిస్తామని ఏపీ ప్రభుత్వం ప్రకటించిన నేపథ్యంలో మరోసారి రియల్‌ రంగంపై అనేక అంచనాలు వ్యక్తమవుతున్నాయి. స్థానికతపైనే ఎక్కువగా ఆధారపడినా ఈ రంగంపై రాష్ట్ర, దేశ ఆర్థిక, రాజకీయ నిర్ణయాలు అంతిమ ప్రభావం చూపుతున్నాయి.
అంతర్జాతీయ భౌగోళిక, ఇతర పరిణామాల ప్రభావం కూడా రియల్‌ రంగంపై అధికంగా ఉంటోంది. ప్రభుత్వ వర్గాల్లో మార్పులు, రాజకీయ, బడ్జెట్‌ సంబంధిత నిర్ణయాలతో ఏర్పడిన మార్పుల నేపథ్యంలో రియల్‌ ఎస్టేట్‌ రంగం పయనమెటనే సందేహం సర్వత్రా వ్యక్తమవుతోంది. తాజాగా తెలంగాణలో మరింత జాగ్రత్తతో కూడిన విధానాన్ని మార్కెట్‌ ప్రతిబింబించినట్లు నైట్‌ ఫ్రాంక్‌, నరెడ్కో సెంటిమెంట్‌ సర్వేలు వెల్లడించాయి.
తెలంగాణలో వృద్ధి…
గత కొంత కాలంగా తెలంగాణలో ట్రిపుల్‌ ఆర్‌, ఫార్మాసిటీ రద్దు, తెలంగాణలో అంతర్జాతీయ సంస్థల పెట్టుబడులతో రియల్‌ రంగం వేగంగా వృద్ధి చెందింది. మార్కెట్‌ విలువల పెంపు నేపథ్యంలో అనూహ్యంగా పెరిగిన రిజిస్ట్రేషన్లు గత రెండు నెలలుగా కొంత మందగించాయి.
రియల్‌ ఎస్టేట్‌ ఇండెక్స్‌ స్కోరు…
రియల్‌ ఎస్టేట్‌ రంగాన్ని జాతీయ స్థాయిలో పోల్చి చూస్తే ప్రస్తుత సెంటిమెంట్‌ ఇండెక్స్‌ స్కోరు, భవిష్యత్తు సెంటిమెంట్‌ స్కోరు ఒకేలా నమోదయ్యాయి. ఈ రెండు ఫలితాలు ఈ ఏడాది రెండో త్రైమాసికంలో 65గా నమోదయ్యాయి. ఈ స్కోరు వందకు చేరువగా ఉంటే రియల్‌ రంగం చాలా సానుకూలంగా ఉన్నట్లు చెప్పుకోవచ్చు.
స్కోరు తగ్గుతున్నా కొద్దీ సెంటిమెంట్‌ అంత బలంగా లేనట్లు భావించాల్సి ఉంటుందంటున్నారు ఆ రంగానికి చెందిన నిపుణులు. మొదటి త్రైమాసికంలో 72గా ఉన్న స్కోరు రెండో త్రైమాసికంలో 65కి తగ్గిపోవడంపై ఆందోళన చెందాల్సిన పనిలేదని, మరింత జాగ్రత్తగా ఉంటూ ఆశావాదం వైపు మారడాన్ని సూచిస్తున్నట్లు నిపుణులు పేర్కొంటున్నారు.
65 స్కోరూ సానుకూలమే, 50 ఉంటే తటస్థం, అంతకంటే ఎక్కువ ఉంటే సానుకూల భావాన్ని తెలియజేస్తుందని చెబుతున్నారు. ఇదిలా ఉంటే ప్రపంచ భౌగోళిక, రాజకీయ పరిణామాల నేపథ్యంలో కీలక సూచీలన్నీ ఆర్థిక వ్యవస్థ స్థిరత్వం, సానుకూతను వెల్లడిస్తున్నాయి. దీంతో ఇళ్లు, అపార్ట్‌మెంట్లు, ఆఫీస్‌ స్పేస్‌ మార్కెట్‌లలో స్థిరమైన వృద్ధిని సర్వే అంచనా వేస్తోంది.
రియల్‌ రంగం అభివృద్ధిపై డెవలపర్లు సానుకూల ధోరణితో ఉన్నారు. డెవలపర్లు కాని భాగస్వాములైన బ్యాంకులు, ఆర్థిక సంస్థలు, పీఈ ఫండ్స్‌ సంస్థల అభిప్రాయం కూడా అనుకూలంగానే ఉందని, వీరిచ్చిన స్కోరు 68ని పరిశీలిస్తే ఇంకా ఎక్కువ విశ్వాసంతో ఉన్నారని తెలుస్తోంది. ఈ స్కోరు తొలి త్రైమాసికం 73తో పోలిస్తే తగ్గినప్పటికీ ఆశావహ ఫలితాలను చూపుతోంది.
రానున్న ఆరునెలలు కీలకం…
వచ్చే ఆరునెలల్లో స్థిరాస్తుల ధరలు పెరుగుతాయని బిల్డర్ల అంచనా. అత్యధికంగా 63 శాతం మంది బిల్డర్లు స్థిరాస్తుల ధరలు పెరుగుతాయని అంచనా వేశారు. ధరలు నిలకడగానే ఉంటాయని 36 శాతం మంది చెబితే.. తగ్గుతాయని చెప్పింది కేవలం ఒక్కశాతమే.
విక్రయాలు పెరుగుతాయని 51 శాతం మంది, కొత్త ప్రాజెక్టుల ప్రారంభాలు ఉంటాయని 61 శాతం మంది తమ అభిప్రాయాన్ని వెల్లడించారు. 2019 ఎన్నికల తర్వాత సరిగ్గా ఇలాంటి పరిస్థితే ఉన్నదని గుర్తు చేస్తూ భవిష్యత్తుపై ఆశావహ దృక్పథాన్ని వెల్లడించారు.
కార్యాలయాల విషయంలో…
ఆఫీస్‌ స్పేస్‌ విభాగంలో లీజింగ్‌ అవకాశాలు పెరుగుతాయనే సానుకూలతను 63 శాతం బిల్డర్లు వ్యక్తం చేశారు. కొత్త కార్యాలయాల రాక పెరుగుతుందని 47 శాతం మంది, అద్దెల్లోనూ పెరుగుదల ఉంటు-ందని అత్యధికంగా 67 శాతం మంది అంచనా వేశారు. తగ్గుతాయనే వారు 7 శాతమే నమోదు కాగా, ఎలాంటి మార్పు ఉండబోదని 27 శాతం మంది తమ అభిప్రాయాన్ని వ్యక్తం చేశారు.
అనుమతుల పరంగా అసంతృప్తి…
హైదరాబాద్‌ మార్కెట్‌లో రియల్‌ రంగం అభివృద్ధికి సానుకూలత ఉన్నా కొత్త ప్రాజెక్టులకు అనుమతుల మంజూరులో జాప్యం జరుగుతోందని బిల్డర్లు కొంత అసంతృప్తిగా ఉన్నారు. వాస్తవానికి ప్రస్తుత పరిస్థితులు అర్థం చేసుకునేందుకు కొత్త సర్కారు అధికారంలోకి వచ్చిన కొన్నాళ్లు అనుమతులపై నిర్ణయం తీసుకోలేదు.
ఆ తర్వాత అనుమతులు ఇస్తున్నామని ప్రభుత్వ పెద్దలు చెబుతున్నా తాత్సారం జరుగుతోందని బిల్డర్లు పేర్కొంటున్నారు. కొత్త ప్రభుత్వం అనుమతుల పరంగా ఉన్న అనిశ్చితిని తొలగించాల్సిన బాధ్యత తీసుకోవాలని బిల్డర్లు పేర్కొన్నారు.