టెక్ ప్రపంచంలో ఇప్పుడు చర్చ అంతా గూగుల్ పిక్సెల్ ఈవెంట్ గురించే. భారత కాలమానం ప్రకారం అక్టోబర్ 4న రాత్రి 7:30గంటలకు అమెరికాలో ఈ ఈవెంట్ జరగనుంది. సంస్థ అధికారిక యూట్యూబ్ ఛానెల్లో ఈ ఈవెంట్ను లైవ్లో చూడవచ్చు. పిక్సెల్ 8 సిరీస్తో పాటు పలు ఆసక్తికర గ్యాడ్జెట్స్ లాంచ్ అవుతాయని టాక్ నడుస్తోంది. ఈ వివరాలు..
గూగుల్ పిక్సెల్ 8 సిరీస్..
మీడియా రిపోర్టుల ప్రకారం గూగుల్ పిక్సెల్ 8లో 6.17 ఇంచ్ ఫుల్ హెచ్డీ+ డిస్ప్లే ఉంటుంది. పిక్సెల్ 8 ప్రోలో 6.7 ఇంచ్ క్యూహెచ్డీ+ డిస్ప్లే ఉండొచ్చు. రెండింటికీ 120హెచ్జెడ్ రిఫ్రెష్ రేట్ లభిస్తుందట! గూగుల్కు చెందిన టెన్సార్ జీ3 చిప్సెట్ ఉండనుంది.
Google Pixel 8 pro : గూగుల్ పిక్సెల్ 8 ప్రోలో ట్రిపుల్ రేర్ కెమెరా సెటప్ ఉంటుందని సమాచారం. పిక్సెల్ 8లో మాత్రం డ్యూయెల్ రేర్ కెమెరా ఉండొచ్చు. ప్రో మోడల్లో బాడీ టెంపరేచర్ సెన్సార్ ఉంటుందని సమాచారం అందుతుంది.
గూగుల్ పిక్సెల్ 8 ధర 699 డాలర్లుగాను పిక్సెల్ 8 ప్రో ధర 899 డాలర్లుగాను ఉండొచ్చు. అంటే ఇండియన్ కరెన్సీలో అవి వరుసగా రూ. 58,120- రూ. 74,750.
Google Pixel watch 2 : గూగుల్ పిక్సెల్ వాచ్ 2 కూడా లాంచ్ సిద్ధమవుతోందని టాక్ నడుస్తోంది. ఇందులో 1.2 ఇంచ్ ఓఎల్ఈడీ డిస్ప్లే ఉండొచ్చు. 2జీబీ ర్యామ్- 16జీబీ స్టోరేజ్ సైతం లభించొచ్చు. అనేక హేల్త్ ట్రాకర్స్, ఫిట్నెస్ ఫీచర్స్ ఇందులో ఉండబోతున్నట్టు తెలుస్తోంది.
ఈ గూగుల్ పిక్సెల్ వాచ్ 2లో 24 గంటల బ్యాటరీ లైఫ్ ఉంటుందని, 75 నిమిషాల్లో ఫుల్ ఛార్జింగ్ చేసుకోవచ్చని లీక్స్ సూచిస్తున్నాయి. అనేక సేఫ్టీ ఫీచర్స్ని కూడా ఇందులో గూగుల్ అప్డేట్ చేసినట్టు కనిపిస్తోంది. ఎమర్జెన్సీ సర్వీసెస్ సమయంలో మెడికల్ డేటాను కూడా షేర్ చేసుకోవచ్చని టెక్ నిపుణులు చెబుతున్నారు.
పిక్సెల్ బడ్స్ ప్రో..
ఈ దఫా ఈవెంట్లో కొత్తగా ఎలాంటి ఇయర్బడ్స్ను గూగుల్ లాంచ్ చేయకపోవచ్చు. అయితే.. పిక్సెల్ బడ్స్ ప్రోకు కొన్ని కలర్ ఆప్షన్స్ ఇస్తుందని తెలుస్తోంది. పార్సిలిన్ కలర్, స్కై బ్లూ కలర్ ఆప్షన్స్ వస్తాయని సమాచారం. ఇవన్నీ రూమర్స్ మాత్రమే. సంస్థ నుంచి అధికారిక ప్రకటన రాలేదు. ఇంకొన్ని రోజుల్లో వీటిపై పూర్తి క్లారిటీ వచ్చేస్తుంది.