న్యూఢిల్లీ : తెలంగాణలో అకాల వర్షాలు, వరదల కారణంగా జరిగిన నష్టాన్ని అంచనా వేసేందుకు కేంద్ర ప్రభుత్వం కేంద్ర బృందాన్ని పంపనుంది. నేషనల్ డిజాస్టర్ మేనేజ్‌మెంట్ అథారిటీ (NDMA) సలహాదారు, కేంద్ర హోం మంత్రిత్వ శాఖ జాయింట్ సెక్రటరీ (ఆపరేషన్స్ & కమ్యూనికేషన్స్) కల్నల్ కీర్తి ప్రతాప్ సింగ్ నేతృత్వంలోని 6 మంది సభ్యుల కేంద్ర బృందం ఈనెల 11న (బుధవారం) తెలంగాణలోని ఖమ్మం, మహబూబాబాద్ జిల్లాలతో సహా వరద ప్రభావిత ప్రాంతాలను సందర్శించనుంది.
ఈ బృందంలో కల్నల్ కెపి సింగ్‌తో పాటు ఆర్థిక శాఖ, వ్యవసాయ శాఖ, రోడ్లు, రహదారుల శాఖ, గ్రామీణాభివృద్ధి శాఖ, నేషనల్ రిమోట్ సెన్సింగ్ సెంటర్ అధికారులు ఉన్నారు. వరద ప్రభావిత ప్రాంతాల్లో కేంద్ర బృందం పర్యటించి బాధితులు, అధికారులతో చర్చిస్తుంది.
ఈ సందర్భంగా.. కేంద్ర బొగ్గు, గనుల శాఖ మంత్రి జి.కిషన్ రెడ్డి గారు కేంద్ర బృందానికి నేతృత్వం వహిస్తున్న కల్నల్ కీర్తిప్రతాప్ సింగ్ గారితో ఫోన్లో మాట్లాడి.. ఆదివారం నాటి తన ఖమ్మం పర్యటనలో తెలుసుకున్న అంశాలను, బాధితుల ఆవేదన, క్షేత్రస్థాయి పరిస్థితులను వివరించారు.