హైదరాబాద్‌లోని పలు ప్రాంతాల్లో కుండపోత వర్షం కురిసింది. గంటపాటు కురిసిన వర్షం నగరాన్ని ముంచెత్తింది. ప్రధానంగా జూబ్లీహిల్స్, బంజారాహిల్స్, పంజాగుట్ట, ఖైరతాబాద్, యూసుఫ్ గూడ, అమీర్ పేట్, ఫిల్మ్ నగర్, కూకట్ పల్లి, నాంపల్లి తదితర ప్రాంతాల్లో ఉరుములు, మెరుపుల‌తో కూడిన భారీ వర్షం కురిసింది.
భారీ వర్షం కారణంగా రోడ్లన్నీ జలమయమై ట్రాఫిక్ జామ్ ఏర్పడింది. పంజాగుట్ట వద్ద కిలోమీటర్ల మేర వాహనాలు బారులు తీరాయి. పలు కాలనీల్లోకి భారీగా వరద నీరు చేరింది. రంగంలోకి దిగిన జీహెచ్‌ఎంసీ సిబ్బంది సహాయక చర్యలు చేపట్టారు.
నైరుతి రుతుపవనాలు బుధవారం రాష్ట్రాన్ని తాకాయి. రాష్ట్రంలో విస్తారంగా వర్షాలు కురుస్తాయని వాతావరణ శాఖ అధికారులు తెలిపారు. ప్రధానంగా దక్షిణ తెలంగాణలో భారీ వర్షాలు కురుస్తాయని ఈ మేరకు ఎల్లో అలర్ట్ ప్రకటించారు.