హైదరాబాద్, ఆంధ్రప్రభ బ్యూరో : శాస్త్ర సాంకేతిక విప్లవంలో ప్రపంచమే అబ్బురపోయేలా భారతదేశం ప్రతిష్టాత్మకంగా చేపట్టిన చంద్రయాన్‌-3 ప్రాజెక్ట్‌ సక్సెస్‌లో తెలంగాణ రాష్ట్రానికి చెందిన యువకుడు భాగస్వామ్యం పంచుకున్నారు. ఇది తెలుగు ప్రజలకు, ముఖ్యంగా తెలంగాణ వారికి గర్వకారణంగా భావిస్తున్నారు. జోగులాంబ గద్వాల జిల్లా ఉండవల్లికి చెందిన కృష్ణ కుమ్మరి చంద్రయాన్‌-3 మిషన్‌లో పేలోడ్స్‌ (ఏహెచ్‌వీసీ), (ఐఎల్‌ఎస్‌ఏ)కి డేటా ప్రాసెసింగ్‌ సాప్ట్‌ వేర్‌ రాశారు. తల్లిదండ్రులు కూలి పనులు చేసుకుంటూ కొడుకుని ఉన్నత చదువులు చదివించారు.
కృష్ణ ప్రాథమిక విద్యాభ్యాసం అంతా ప్రభుత్వ పాఠశాలలోనే కొనసాగింది. అనంతరం ఈ సెట్‌ రాసి హైదరాబాదులో కంప్యూటర్‌ సైన్స్‌ చదివాడు. ప్లేస్‌మెంట్‌లో ఉద్యోగం రావడంతో అక్కడ పని చేస్తూనే ఇస్రోలో ఐసీఆర్బీ రాసి ఆలిండియా స్థాయిలో 4వ ర్యాంకు తెచ్చుకున్నారు. అనంతరం 2018 జనవరిలో సైంటిస్ట్‌ లెవల్‌ ఉద్యోగం పొందారు. గ్రూస్‌-ఏ గెజిటెడ్‌ అధికారి, యూఆర్‌ రావు ఆధీనంలోని ఇస్రో శాటిలైట్‌ సెంటర్‌లో తెలంగాణ ముద్దుబిడ్డ కృష్ణ కుమ్మరి విధులు నిర్వర్తిస్తున్నారు.
ఈ క్రమంలోనే చంద్రయాన్‌-3 సాంకేతిక విభాగంలో పనిచేసేందుకు కృష్ణకు అవకాశం అభించింది. ఈ ప్రాజెక్ట్‌లో అనేక కేంద్రాలు పనిచేశాయి. మిషన్‌ లోని 2 పేలోడ్స్‌లో ఐదుగురు సభ్యులు పని చేస్తే, కృష్ణ డేటా ప్రాసెసింగ్‌ అనాలసిస్‌ సాప్ట్‌ వేర్‌ రాసినట్లు తెలిపారు. చంద్రయాన్‌ 3 మిషన్‌కు 6 నెలల పాటు పని చేసినట్లు ఆయన వివరించారు. ఈ ప్రాజెక్ట్‌ 100 శాతం విజయవంతం అవుతుందని గట్టిగా నమ్మిన వ్యక్తుల్లో కృష్ణ ఒకరు. తనకు ఐదేళ్ల వయస్సులో పోలియో సోకి నరాలు చచ్చుబడ్డాయని ఆయన తన వ్యక్తిగంత గురించి సామాజిక మాధ్యమాల ద్వారా తెలిపారు.
దీనికి ఆయుర్వేద వైద్యంలో చికిత్స తీసుకున్నట్లు పేర్కొన్నారు. ప్రసిద్ధ ఆయుర్వేద వైద్యుడు రామేశ్వర్‌రెడ్డి వద్ద 10 సంవత్సరాల పాటు చికిత్స చేయించుకున్నానని, ఆ తరువాతే తన పనులు తాను చేసుకునే వాడినని తెలిపారు. దాదాపు 23 ఏళ్ల పాటు ఆయుర్వేద మందులు వాడినట్లు చెప్పారు. తల్లిదండ్రులు జన్మనిస్తే, వైద్యుడు పునర్జన్మనిచ్చారని.. అనంతరం ప్రపంచం గర్వించదగిన చంద్రయాన్‌-3 సక్సెస్‌లో పనిచేసే అవకాశం లభించిందని ఆయన సంతోషం వ్యక్తం చేశారు.