వైన్ షాపుల ముందు భారీ క్యూలైన్.. జగన్ సర్కారు పనితనానికి ఇదేనా నిదర్శనం?

ఏపీ సర్కారుపై టీడీపీ నేత గోరంట్ల బుచ్చ‌య్య చౌదరి మరోసారి తీవ్ర విమ‌ర్శ‌లు గుప్పించారు. ‘ఏపీలో రేషన్ తీసుకోవాలన్నా ఇదే పరిస్థితి… ఇప్పుడు వ్యాక్సిన్‌కు ఇదే పరిస్థితి… అది చాలదు అన్నట్లు వైన్ షాపుల ముందు అదే దుస్థితి. నేను ఉన్నాను… నేను విన్నాను.. కానీ ఏవీ కనపడవు.. అంతేనా ముఖ్యమంత్రి జ‌గ‌న్ గారు’ అని గోరంట్ల బుచ్చ‌య్య చౌద‌రి ట్విట్టర్ వేదికగా విమ‌ర్శ‌లు గుప్పించారు. ఏపీ సర్కారు పనితనానికి ఇదేనా నిదర్శనం అని నిలదీశారు. వైన్ షాప్ ముందు భారీ క్యూకి సంబంధించిన ఫొటోను ఈ సంద‌ర్భంగా ఆయ‌న పోస్ట్ చేశారు.

మరోవైపు రేషన్ డోర్ డెలివరీపై కూడా గోరంట్ల విమ‌ర్శ‌లు గుప్పించారు. ‘ప్రభుత్వం ప్రకటనలు గొప్ప పనితనం మాత్రం దిబ్బ అన్నట్లు ఉంది. రేషన్ డోర్ డెలివరీ చేసేవారికి కనీస రక్షణ కల్పించలేక పోవడం దారుణం. ఫేస్ షీల్డ్, పీపీఈ కిట్లు ఇవ్వకపోవడం ఇన్సూరెన్స్ చేయించకపోవడం దారుణం. ఈ రోజు రాజమండ్రి ఆనం కళాకేంద్రంలో వ్యాన్ డ్రైవర్లు ఆందోళనలు చేశారు. ప్రభుత్వం వెంటనే దీనిపై దృష్టి సారించాలి’ అని గోరంట్ల డిమాండ్ చేశారు.