కరోనా వేళ… సూర్య బ్రదర్స్ రూ.కోటి విరాళం

కరోనా విజృంభిస్తున్న వేళ తమిళనాడు ప్రభుత్వానికి ప్రముఖ హీరోలు సూర్య, అతడి సోదరుడు కార్తీ బాసటగా నిలిచారు. తమిళనాడు సీఎం సహాయనిధికి రూ.కోటి విరాళం ప్రకటించారు. ఈ మేరకు సీఎం స్టాలిన్‌ను సూర్య, కార్తీ, వారి తండ్రి శివకుమార్ కలిసి రూ.కోటి చెక్కును అందజేశారు. ఈ సందర్భంగా శివకుమార్ మీడియాతో మాట్లాడారు. కరోనాతో ఇబ్బంది పడుతున్న తమిళులకు ఉపాధి కల్పించే అంశంపై సీఎంతో చర్చించినట్లు తెలిపారు. కరుణానిధి తమకు నాలుగు దశాబ్దాలుగా తెలుసు అని, ఇప్పుడు ఆయన కుమారుడు స్టాలిన్ ముఖ్యమంత్రి కావడం ఎంతో సంతోషంగా ఉందని పేర్కొన్నారు.