ప్రపంచ బ్యాడ్మింటన్‌ ఛాంపియన్‌షిప్‌ పురుషుల సింగిల్స్‌లో తెలుగు కిశోరం కిదాంబి శ్రీకాంత్ రజత పతకంతో కొత్త చరిత్ర సృష్టించాడు. ఫైనల్‌పోరులో సింగపూర్‌కు చెందిన లో కియాన్‌ యోతో పోరాడిన తెలుగుతేజం శ్రీకాంత్ రజతంతో మెరిశాడు. టైటిల్‌ పోరులో 15-21, 20-22తేడాతో ఓడినా భారత్‌కు తొలి రజతాన్ని అందించి పురుష షట్లర్‌గా రికార్డుల్లోకి ఎక్కాడు. ప్రపంచ ఛాంపియన్‌షిప్‌ టైటిల్‌ పోరులో భారత స్టార్‌ షట్లర్‌ కిదాంబి శ్రీకాంత్-సింగ్‌పూర్‌కు చెందిన లో కియాన్‌ యో తొలిసారి తుదిపోరులో తలపడ్డారు. మ్యాచ్‌ ఆరంభంలోనే కియాన్‌ తొలిపాయింట్‌ సాధించినా అనంతరం శ్రీకాంత్ పుంజుకుని వరుసగా నాలుగు పాయింట్లు సాధించి 9-7 ఆధిక్యాన్ని సాధించాడు. సగం సమయం ముగిసేసరికి శ్రీకాంత్ తన ఆధిక్యాన్ని 11-7కు పెంచుకున్నాడు. అయితే కియాన్‌ 11-11తో స్కోరు సమం చేసి శ్రీకాంత్‌ను అధిగమించి 15-13తో వెనక్కి నెట్టాడు. అదే జోరుతో తొలిసెట్‌ను 21-15తో శ్రీకాంత్‌పై గెలుచుకున్నాడు.
రెండో సెట్‌లో స్మాష్‌లతో విరుచుకుపడిన శ్రీకాంత్ 7-4తో ఆధిక్యాన్ని సాధించినా కియాన్‌ 9-9తో స్కోరును సమం చేశాడు. రెండో గేమ్‌లో అద్భుత స్మాష్‌తో 11వ పాయింట్‌ సాధించిన కియాన్‌ 11-9తో దూసుకుపోయాడు. అయితే శ్రీకాంత్ 14-14తో స్కోరు సమం చేయడంతో భారత అభిమానుల ఆశలు చివురించాయి. వారి ఆశలకు తగ్గట్లుగానే శ్రీకాంత్ తన ఆధిక్యాన్ని 17-15కు పెంచుకున్నాడు. ఇకనుంచి ఇరువురు హోరాహోరీగా తలపడటంతో మ్యాచ్‌ ఉత్కంఠకు దారితీసింది. సెకండ్‌ గేమ్‌లో 20-20స్కోరు సమం అవడంతో ఉత్కంఠ పతాకస్థాయికి చేరింది. ఒక్క పాయింటు గెలిచి శ్రీకాంత్ రేసులోకి వస్తాడనుకున్న తరుణంలో కియాన్‌ విరుచుకుపడి 22-20తో రెండో సెట్‌ను గెలుచుకుని ప్రపంచ ఛాంపియన్‌గా అవతరించాడు. లో కియాన్‌ యో 21-15, 22-20తేడాతో వరుస సెట్లలో శ్రీకాంత్‌ను ఓడించి స్వర్ణ పతకాన్ని గెలుచుకోవడంతో శ్రీకాంత్ రజత పతకాన్ని సాధించి సిల్వర్‌ మెడల్‌ సాధించిన తొలి భారత షట్లర్‌గా నిలిచాడు.
లోక‌ల్ టు గ్లోబ‌ల్.. ప్రభన్యూస్ కోసం ఫేస్‌బుక్‌, ట్విట‌ర్ పేజీల‌ను ఫాలో అవ్వండి..
#AndhraPrabha #AndhraPrabhaDigital