నంది అవార్డులంతా గొప్పగా డిసెంబర్9వ తేదీన గద్దర్ అవార్డులు ఇస్తామని గతంలో ప్రకటించానని… కానీ సినీరంగం నుంచి ఎలాంటి స్పందన రాలేదని ముఖ్యమంత్రి రేవంత్‌రెడ్డి చెప్పారు. గద్దర్ అవార్డుల అంశంపై సినీరంగ ప్రముఖులు ప్రతిపాదనలతో ముందుకు రావాలని తెలంగాణ ముఖ్యమంత్రి రేవంత్‌రెడ్డి కోరారు.
డా.సి.నారాయణ రెడ్డి 93వ జయంతి సందర్భంగా రవీంద్రభారతిలో (సోమవారం) విశ్వంభర డా.సి.నారాయణరెడ్డి జాతీయ సాహిత్య పురస్కార ప్రదానోత్సవం జరిగింది. ఈ కార్యక్రమానికి ముఖ్య అతిథిగా ముఖ్యమంత్రి రేవంత్‌రెడ్డితో పాటు పలువురు ప్రముఖులు హాజరయ్యారు. ఈ సందర్భంగా రేవంత్ రెడ్డి ప్రముఖ తమిళ రచయిత్రి, సరస్వతీ సమ్మాన్ పురస్కార గ్రహీత శ్రీమతి శివ శంకరికి విశ్వంభర డా.సి.నారాయణరెడ్డి జాతీయ సాహిత్య పురస్కారం ప్రదానం చేశారు.
అనంత‌రం మాట్లాడుతూ.. డాక్టర్ సి.నారాయణరెడ్డి జీవితం అందరికీ స్ఫూర్తిదాయకమన్నారు. ఆయ‌న కేవలం యధాలాపంగా రచనలు రాయలేదని, ప్రతి విషయంలో లీనమై రాశారని వివరించారు. సి.నారాయణరెడ్డి స్మారకార్థం ఏం చేయాలనేది త్వరలోనే ప్రభుత్వం నిర్ణయం తీసుకుంటుందన్నారు. ఎవరైనా ఆయ‌న రచనలను పుస్తకంగా రూపొందించాలనుకుంటే రాష్ట్ర ప్రభుత్వం తరపున సహకారం అందిస్తామని ముఖ్యమంత్రి రేవంత్ రెడ్డి తెలిపారు.