న్యూఢిల్లీ, ఆంధ్రప్రభ: ఆంధ్రప్రదేశ్ మూడు రాజధానుల వ్యవహారంపై హైకోర్టు తీర్పును సవాల్ చేస్తూ రాష్ట్ర ప్రభుత్వం దాఖలు చేసిన పిటిషన్‌పై మార్చి 28న విచారణ జరగనుంది. ఫిబ్రవరి 23న ఈ కేసు విచారణ చేపట్టాల్సినప్పటికీ, ఆ రోజు లిస్టులో కేసును చేర్చలేదు. బుధ, గురువారాల్లో ఆఫ్టర్ నోటీస్ కేసులను చేపట్టరాదంటూ ప్రధాన న్యాయమూర్తి సర్క్యులర్ జారీ చేయడంతో కేసు జాబితాలో చోటు దక్కించుకోలేకపోయింది. తదుపరి విచారణ ఎప్పుడన్న విషయంపై స్పష్టత లేదు. ఈ పరిస్థితుల్లో రాష్ట్ర ప్రభుత్వం సోమవారం సుప్రీంకోర్టులో కేసును ప్రస్తావించింది. త్వరితగతిన విచారణ చేపట్టాలని జస్టిస్ కేఎం జోసెఫ్, జస్టిస్ బీవీ నాగరత్నతో కూడిన ధర్మాసనాన్ని కోరింది. ఈ క్రమంలో కేసును మార్చి 28న విచారణ జరిపే కేసులో జాబితాలో చేర్చుతామని ధర్మాసనం తెలిపింది.
ఆంధ్రప్రదేశ్ రాష్ట్ర ప్రభుత్వం తీసుకున్న మూడు రాజధానుల నిర్ణయాన్ని తప్పుబడుతూ అమరావతినే ఏకైక రాజధానిగా కొనసాగించాలని ఆంధ్రప్రదేశ్ రాష్ట్ర హైకోర్టు ఇచ్చిన తీర్పుపై రాష్ట్ర ప్రభుత్వం గత ఏడాది సుప్రీంకోర్టును ఆశ్రయించింది. ఈ కేసుపై డిసెంబర్లో విచారణ జరిపిన సుప్రీంకోర్టు ధర్మాసనం, హైకోర్టు ఇచ్చిన తీర్పులోని ఏడు అంశాల్లో 5 అంశాలపై స్టే విధించింది. ప్రతివాదులకు నోటీసులు జారీ చేసి కౌంటర్లు దాఖలు చేయాల్సిందిగా ఆదేశించింది. ఈ క్రమంలో జనవరి 27న జరిగిన విచారణ సందర్భంగా అమరావతి రైతులు తమకు నోటీసులు అందాయని, కౌంటర్ దాఖలు చేయడానికి కనీసం 2 వారాలు సమయం కావాలని కోరారు. రైతులకు ఆ మేరకు వెసులుబాటు కల్పిస్తూ కేసు విచారణ ఫిబ్రవరి 23కు వాయిదా వేసినప్పటికీ, ఆ రోజు విచారణ జరగలేదు. సోమవారం రాష్ట్ర ప్రభుత్వం ప్రస్తావించడంతో తదుపరి విచారణ తేదీ మార్చి 28గా ఖరారైంది.