2024లో అత్యధికంగా హీట్‌వేవ్‌ రోజులను చూసే మొదటి మూడు రాష్ట్రాల జాబితాలో ఒడిశా, ఉత్తరప్రదేశ్‌, పశ్చిమ బెంగాల్‌ ఉన్నాయని కేంద్రం గురువారం తెలిపింది. రాజ్యసభలో సమాచారాన్ని వెల్లడిస్తూ, సైన్స్ టెక్నాలజీ, ఎర్త్‌ సైన్సెస్‌ మంత్రి, డాక్టర్‌ జితేంద్ర సింగ్‌ ఈ మేరకు వెల్లడించారు.
ఒడిశాలో 2024లో 37 హీట్‌వేవ్‌ రోజులు నమోదయ్యాయి. ఆ తర్వాత తూర్పు యూపీ 33రోజులు, పశ్చిమ యూపీ 32రోజులు, పశ్చిమ బెంగాల్‌ 31రోజులుగా రికార్డయ్యాయి. మొత్తం 554 హీట్‌వేవ్‌ రోజులు నమోదయ్యాయి. భారత వాతావరణ విభాగం (ఐఎండీ), జాతీయ విపత్తు నిర్వహణ అథారిటీ, స్థానిక ఆరోగ్య శాఖల సహకారంతో, వేడి తరంగాల గురించి ముందస్తుగా హెచ్చరించడానికి దేశంలోని అనేక ప్రాంతాల్లో హీట్‌ యాక్షన్‌ ప్లాన్‌ని కేంద్రం ప్రారంభించింది.
కార్మికులపై వేడి తరంగాల ప్రభావాన్ని తగ్గించడానికి అనుసరించాల్సిన మార్గదర్శకాలను కూడా అభివృద్ధి చేసింది అని సింగ్‌ చెప్పారు. భారత వాతావరణ శాఖ ఇటీవలి ఐదేళ్లలో భారీ వర్షపాతం, పొగమంచు, వేడి/చల్లని అలలు, ఉరుములు వంటి అన్ని తీవ్రమైన వాతావరణ సంఘటనల అంచనా ఖచ్చితత్వంలో 40 నుండి 50 శాతం మెరుగుదల ఉందని మరొక ప్రశ్నకు సింగ్‌ చెప్పారు.