ప్రముఖ సినిమాటోగ్రాఫర్ గరుడ వేగా అంజి దర్శకత్వంలో రాకింగ్ రాకేష్ హీరోగా ‘కేశవ చంద్ర రమావత్’ (KCR) సినిమా తెరకెక్కుతోంది. రాకేష్ హీరోగానే కాకుండా ఈ సినిమాకి నిర్మాతగా వ్యవహరిస్తున్నారు. ఇప్పటికే ఈ సినిమా నుంచి రిలీజ్ చేసిన ఫస్ట్ లుక్, సాంగ్ మంచి రెస్పాన్స్ వచ్చింది. ఇక తాజాగా ఈ సినిమా నుంచి మరో పాటను రిలీజ్ చేశారు. తెలంగాణా మాజీ సీఎం కేసీఆర్ చేతుల మీదుగా ఈ పాటను రిలీజ్ చేయించడం విశేషం. . హైదరాబాద్‌ నందినగర్‌లోని కేసీఆర్ నివాసానికి సినిమా హీరో, నిర్మాత రాకింగ్ రాకేశ్‌ శుక్రవారం వెళ్లి ఆయన్ను కలుసుకున్నారు. రాకింగ్ రాకేశ్‌తోపాటు, మ్యూజిక్‌ డైరెక్టర్‌ చరణ్‌ అర్జున్‌, జోర్దార్‌ సుజాత, సింగర్లు విహ, గీత, రచయిత సంజయ్‌ మహేశ్‌లు కేసీఆర్‌ను కలిశారు. ఈ సందర్భంగా తెలుగు తేజం పాటను కేసీఆర్ ఆవిష్కరించారు.
ఈ ఆవిష్కరణ కార్యక్రమంలో రాజ్యసభ సభ్యుడు దామోదర్‌రావు, బీఆర్‌ఎస్‌ నేతలు బోయిన్‌పల్లి వినోద్ కుమార్, సంతోశ్‌ కుమార్, మధుసుధనచారి, దేశపతి శ్రీనివాస్, మారెడ్డి శ్రీనివాస్ రెడ్డి, రాఘవ తదితరులు పాల్గొన్నారు.