బిహార్ పోలీసులు ఓ జర్నలిస్టును కొట్టిన ఘటన ఇప్పుడు సీరియస్ అయ్యింది. అనుమానాస్పద స్థితిలో మృతి చెందిన ఓ వ్యక్తి వార్తను కవర్ చేయడానికి వెళ్లిన స్థానిక జర్నలిస్టుపై అకారణంగా దాడి చేశారు. బిహార్‌లోని సరన్ జిల్లా గర్ఖా పోలీస్ స్టేషన్‌కు చెందిన పోలీసు బృందం ఈ ఘటనకు పాల్పడింది. నిన్న (గురువారం) గర్ఖా పోలీస్ స్టేషన్ పరిధిలోని మోతీతాజ్‌పూర్ పంచాయతీలోని ఔదామల్ గ్రామంలో కల్తీ మద్యం తాగి ఓ వ్యక్తి ప్రాణాలు కోల్పోయాడు. మద్యం సేవించడమే అతని మృతికి కారణమని మృతుడి బంధువులు చెబుతున్నారు. మృతుడు కర్ముల్లా కుమారుడు అల్లావుద్దీన్ ఖాన్ (35)గా గుర్తించారు. ఈ సమాచారం అందుకున్న వెంటనే గర్ఖా పోలీస్ స్టేషన్, మర్హౌరా పోలీస్ స్టేషన్ పోలీసులు సంఘటనా స్థలానికి చేరుకుని కేసు దర్యాప్తు ప్రారంభించారు.
అంతకుముందు గర్ఖా పోలీస్ స్టేషన్ ఇన్చార్జి తన బృందంతో సంఘటనా స్థలానికి చేరుకున్నప్పుడు, ఫేస్‌బుక్ / యూట్యూబ్‌లో వార్తలను పోస్టు చేసే స్థానిక జర్నలిస్టులు కూడా ఉన్నారు. ఈ క్రమంలో కొన్ని ప్రశ్నలను లేవనెత్తిన స్థానిక జర్నలిస్టు అనుప్‌కు పోలీసు బృందం సభ్యులకు మధ్య వాగ్వాదం జరిగింది. ఆ వెంటనే పోలీసు బృందం ఆ ప్రశ్నలు అడిగిన విలేకరిని తీవ్రంగా కొట్టారు. అతని మైక్ లాగేసి విసిరికొట్టి, అతని ఐడీ కార్డుని కాళ్లతో తొక్కి పగలగొట్టారు.
స్థానికులు తెలిపిన వివరాల ప్రకారం.. బిహార్ రాష్ట్రంలో కల్తీ మద్యం అమ్మకాలు, వినియోగంపై నిషేధం ఉన్నప్పటికీ విచ్చలవిడిగా దొరుకుతుండడంపై జర్నలిస్టు ప్రశ్నలు లేవనెత్తారు. దీంతో ఆగ్రహానికి గురైన పోలీసులు, ఈ ఘటన బయటకు రాకుండా ఉండడానికే అతడిని కొట్టారు. దీంతో ఆగ్రహించిన గ్రామస్తులు పోలీస్‌స్టేషన్‌ ఇన్‌చార్జికి వ్యతిరేకంగా నినాదాలు చేస్తూ నిరసన వ్యక్తం చేశారు.