హైదరాబాద్, ఆంధ్రప్రభ: రాష్ట్ర ప్రభుత్వం భూముల అమ్మకం ప్రక్రియ కొనసాగిస్తోంది. పన్నేతర ఆదాయాన్ని సమకూర్చుకోవడంలో ప్రభుత్వానికి భూముల అమ్మకం కీలకంగా మారిన విషయం తెలిసిందే. దీంతో రాజధాని హైదరాబాద్‌లో అభివృద్ధి చేసిన భూములను ముందుగా ప్రభుత్వం విక్రయిస్తోంది. ఈ క్రమంలో తాజాగా హైదరాబాద్ మెట్రోపాలిటన్‌ డెవలప్‌మెంట్‌ అథారిటీ (హెచ్‌ఎండీఏ) హైదరాబాద్ శివార్లలోని తుర్కయంజాల్‌ ప్రాంతంలో అభివృద్ధి చేసిన తొమ్మిదిన్నర ఎకరాల భూమిని అమ్మేందుకు రంగం సిద్ధం చేసింది. ఓపెన్ కాంపిటీటివ్‌ బిడ్డింగ్‌లో భూములను వేలం వేసేందుకు అన్ని ఏర్పాట్లు చేసింది. ఈ వేలానికి హెచ్‌ఎండీఏ మంగళవారం నోటిఫికేషన్‌ జారీ చేయనుంది. హెచ్‌ఎండీఏ నిర్ణయించిన అప్‌సెట్‌ ధర ఆధారంగా ఈ ప్లాట్లన్నీ అమ్ముడైతే ప్రభుత్వ ఖజానాకు ఒక్కరోజులో రూ.100 కోట్లకు పైగా నిధులు సమకూరనున్నట్లు తెలుస్తోంది.
తొమ్మి దిన్నర ఎక రాలను మొత్తం 34 ప్లాట్లుగా అభివృద్ధి చేసిన హెచ్‌ఎండీఏ వీటన్నింటిని వేలంలో విక్రయించనున్నట్లు తెలిపింది. ఈ ప్లాట్లలో 600-700 స్క్వేర్‌ యార్డుల విస్తీర్ణం కలిగిన ప్లాట్లు 14 ఉండగా 701-800 గజాల విస్తీర్ణం కలిగిన ప్లాట్లు 10, 800-850 గజాల విస్తీర్ణం కలిగిన ప్లాట్లు 5, 900-1050 మరో 5 ఉన్నట్లు హెచ్‌ఎండీఏ ప్రకటించింది. ఈ ప్లాట్ల వేలంలో ఒక్కోగజానికి అప్‌సెట్‌ ధరను హెచ్‌ఎండీ రూ.40 వేలుగా నిర్ణయించింది. ఒక్క ప్లాటు బిడ్డింగ్‌ చేయడానికి రూ.5 లక్షలు ఎర్నెస్ట్‌ మనీ డిపాజిట్‌(ఈఎండీ)గా చెల్లించాలని తెలిపింది. వేలంలో విక్రయించే అన్ని ప్లాట్లలో గ్రౌండ్‌ ఫ్లోర్‌తో పాటు 5 అంతస్తులు నిర్మించుకోవచ్చని పేర్కొంది.
ఎఫ్‌డీఐలకు 100 శాతం అనుమతి.
హెచ్‌ఎండీఏ నిర్వహిస్తున్న ఈ-వేలంలో విదేశీ వ్యకలు, కంపెనీలకు అవకాశం కల్పించింది. రియల్‌ ఎస్టేట్‌లో ఆటోమెటిక్‌ రూట్‌లో 100 శాతం విదేశీ ప్రత్యక్ష పెట్టు బడులకు (ఎఫ్‌డీఐ)లకు అనుమతి ఉండడంతో ఈ అవకాశం కల్పించినట్లు హెచ్‌ఎండీఏ తెలిపింది. అయితే విదేశీ వ్యక్తులు, కంపెనీలు రిజర్వు బ్యాంకు ఆఫ్‌ ఇండియా(ఆర్బీఐ) నిబంధనలు, ఫెమా నిబంధనలకు అనుగుణంగా బిడ్డింగ్‌లో పాల్గొనాల్సి ఉంటుందని అధికారులు తెలిపారు.
గతంలో కాసుల వర్షం కురిపించిన హెచ్‌ఎండీఏ భూ వేలాలు…
గతేడాది హైదరాబాద్ ఐటీ కారిడార్‌లో హెచ్‌ఎండీఏ ఆధ్వర్యంలో నిర్వహించిన భూముల ఈ వేలం పాటలు గ్రాండ్‌ సక్సెస్‌ అయ్యాయి. దీంతో ప్రభుత్వానికి కాసుల వర్షం కురిసింది. కోకాపేట, ఖానామెట్‌లలో నిర్వహించిన వేలం లలో ప్రభుత్వానికి అతి స్వల్ప వ్యవధిలో ఏకంగా వెయ్యి కోట్ల రూపాయలపైనే సమకూరింది. ఈ వేలం పాటల్లో ఎకరం రూ.60 కోట్లకుపైగా పలకడం హైదరాబాద్ రియల్‌ ఎస్టేట్‌ వర్గాల్లోనే కాక దేశవ్యాప్తంగా రియల్‌ఎస్టేట్‌ వర్గాల్లో చర్చనీయాంశమైంది. హెచ్‌ఎండీఏ అభివృద్ధి చేసి అమ్మ కానికి పెట్టిన ప్లాట్లపై కొనుగోలుదారులకు ఉన్న నమ్మకాన్ని ఈ వేలం పాటల విజయం సూచిస్తోందని అధికారులు చెబుతున్నారు.
లోక‌ల్ టు గ్లోబ‌ల్.. ప్రభన్యూస్ కోసం ఫేస్‌బుక్‌, ట్విట‌ర్, టెలిగ్రామ్ పేజీల‌ను ఫాలో అవ్వండి..