హైదరాబాద్‌, ఆంధ్రప్రభ బ్యూరో : రాష్ట్ర ప్రభుత్వం ప్రతిష్టాత్మకంగా నిర్వహిస్తున్న తెలంగాణ అవతరణ దినోత్సవ వేడుకలకు ప్రజలంతా స్వచ్చందంగా రావాలని, ఈ కార్యక్రమాలను తిలకించి ఆస్వాదించాలని రాష్ట్ర సమాచార, పౌర సంబంధాల శాఖ కమిషనర్‌ హనుమంతరావు విజ్ఞప్తి చేశారు.
ఉదయం పరేడ్‌ గ్రౌండ్‌లో జరిగే కార్యక్రమాలకు సంబంధించిన అన్ని ఏర్పాట్లు పూర్తి చేశామని, అతిధులకు, ఆహ్వానితులకు, అతిధులకు ఎలాంటి లోటుపాట్లు లేకుండా పకడ్బందీ చర్యలు తీసుకుంటున్నామని తెలిపారు. ఈ సందర్భంగా శనివారం సచివాలయంలో ఏర్పాటు చేసిన మీడియా ప్రతినిధుల సమావేశంలో ఆయన మాట్లాడారు.
ప్రజలకు వెసులుబాటుగా ఉండేందుకు పరేడ్‌ గ్రౌండ్‌ వద్ద, ట్యాంక్‌బండ్‌పై భారీ ఎల్‌ఈడీ స్క్రీన్‌లను ఏర్పాటు చేశామన్నారు. ఉదయం నుంచి రాత్రి వరకు జరిగే కార్యక్రమాలను రాష్ట్ర ప్రజలంతా తిలకించేందుకు వీలుగా లైవ్‌ టెలికాస్ట్‌ ఉంటుందని పేర్కొన్నారు.
రాష్ట్ర గీతం ‘జయ జయహే తెలంగాణ’ ఆవిష్కరణ కార్యక్రమం ఓ గొప్ప సందర్భమని, గీతాలాపణకు పరేడ్‌ గ్రౌండ్‌, ట్యాంక్‌బండ్‌ వద్ద ప్రత్యేక ఏర్పాట్లు చేస్తున్నామన్నారు. మీడియా ప్రతినిధులు కెమెరాలు లేకుండా హాజరు కావాలని విజ్ఞప్తి చేశారు. ఈ రెండు కార్యక్రమాలకు సంబంధించి 18 కెమెరాలతో అన్ని కోణాల్లో లైవ్‌ ఫీడింగ్‌ ఇస్తామని వెల్లడించారు.
ప్రతిష్టాత్మక సంబురాలను తిలకించండి.. అంటూ కమిషనర్‌ హనుమంతరావు ఈ సందర్భంగా ప్రజలందరికీ ఆహ్వానం పలికారు. ఉదయం నుంచి రాత్రి వరకు నిరంతర కార్యక్రమాలు ఉంటాయని, 18 కెమెరాలతో అన్ని కోణాల్లో లైవ్‌ ఫీడింగ్‌ ఇస్తామని తెలిపారు. ప్రముఖులు, అతిధులు హాజరవుతుండడంతో ట్రాఫిక్‌కు అంతరాయం ఏర్పాడుతుందని, ఇది ప్రత్యేక సందర్భం.. ప్రజలంతా సహకరించాలని ఆయన విజ్ఞప్తి చేశారు.
షెడ్యూల్‌ వివరాలు ఇవే..
- ఆదివారం (జూన్‌ 2న) ఉదయం 9.30కు గన్‌పార్క్‌లో అమర వీరుల స్థూపం వద్ద తెలంగాణ రాష్ట్ర సాధనలో అమరులైన వారికి సీఎం రేవంత్‌ రెడ్డి, ఇతరులు నివాళులు అర్పిస్తారు.
- ఉదయం 10 గంటలకు సికింద్రాబాద్‌ పరేడ్‌ గ్రౌండ్‌లో సీఎం రేవంత్‌ రెడ్డి జాతీయ పతాకావిష్కరణ చేస్తారు. పోలీసు బలగాల పేరేడ్‌, మార్చ్‌ ఫాస్ట్‌, వందన స్వీకార కార్యక్రమం ఉంటుంది.
- తెలంగాణ రాష్ట్ర అధికారిక గీతాన్ని ఆవిష్కరిస్తారు.
- అనంతరం సోనియాగాంధీ ప్రసంగం, ముఖ్యమంత్రి రేవంత్‌ రెడ్డి ప్రసంగం ఉంటు-ంది.
- పోలీసు సిబ్బందికి, ఉత్తమ కాంటింజెంట్లకు అవార్డులను ప్రదానం చేస్తారు. అవార్డు స్వీకర్తలతో ఫోటో సెషన్‌ అనంతరం కార్యక్రమం ముగుస్తుంది.
- జూన్‌ 2 సాయంత్రం ట్యాంక్‌ బండ్‌పై తెలంగాణ ఆవిర్భావ వేడుకలు ప్రారంభమవుతాయి. తెలంగాణకు సంబంధించిన హస్తకళలు, ప్రత్యేక ఉత్పత్తులు, వివిధ రకాల ఫుడ్‌ స్టాల్స్‌ ట్యాంక్‌ బండ్‌ పై ఏర్పాటు- చేస్తున్నారు.
- సాయంత్రం 6.30కు ముఖ్యమంత్రి ట్యాంక్‌ బండ్‌ కు చేరుకొని అక్కడ ఏర్పాటు- చేసిన వివిధ స్టాళ్లను సందర్శిస్తారు.
- అనంతరం తెలంగాణ కళారూపాల అద్భుత ప్రదర్శనకు అద్దం పట్టే కార్నివాల్‌ నిర్వహిస్తారు. దాదాపు 700 మంది కళాకారులు ఇందులో పాల్గొంటారు.
- అనంతరం ట్యాంక్‌ బండ్‌ ఏర్పాటు- చేసిన వేదికపై 70 నిమిషాల పాటు- వివిధ సాంస్కృతిక నృత్య ప్రదర్శనలు ఉంటాయి.
- స్టేజ్‌ షో అనంతరం జాతీయ జెండాలతో ట్యాంక్‌ బండ్‌పై ఇటు- చివర నుంచి అటు- చివరి వారకు భారీ ఫ్లాగ్‌ వాక్‌ నిర్వహిస్తారు. దాదాపు 5 వేల మంది ఇందులో పాల్గొంటారు. ఈ ఫ్లాగ్‌ వాక్‌ జరుగుతున్నంత సేపు జయ జయహే తెలంగాణ ఫుల్‌ వర్షన్‌ (13.30 నిమిషాలు) గీతాన్ని విడుదల చేస్తారు.
- అదే వేదికపై తెలంగాణ కవి అందెశ్రీ, సంగీత దర్శకుడు ఎంఎం కీరవాణిలకు సన్మానం చేస్తారు.
- రాత్రి 8.50 గంటలకు పది నిమిషాల పాటు- హుస్సేన్‌ సాగరం మీదుగా ఆకాశంలో రంగులు విరజిమ్మేలా ఫైర్‌వర్క్స్‌ కార్యక్రమంతో వేడుకలను ముగిస్తారు.