న్యూఢిల్లీ, ఆంధ్రప్రభ : బహుళత్వంలో ఏకత్వమే భారత సమాజ తత్వమని ఆంధ్రప్రదేశ్ గవర్నర్ ఎస్.అబ్దుల్ నజీర్ అన్నారు. మంగళవారం న్యూఢిల్లీలోని అంబేద్కర్ ఇంటర్నేషనల్ సెంటర్‌లో నిర్వహించిన ఇండియన్ మైనారిటీస్ ఫౌండేషన్ ప్రారంభోత్సవ కార్యక్రమంలో ఆయన ముఖ్య అతిథిగా పాల్గొన్నారు. ఈ సందర్భంగా గవర్నర్ సామరస్యత సాధనమైన రాజ్యాంగం జాతి, కుల, మత వివక్ష లేకుండా అందరికీ ప్రాథమిక హక్కులను సమానంగా అందించిందన్నారు.
ప్రతి ఒక్కరి ప్రాథమిక అవసరాలు తీర్చడంతో మొదలు ‘సబ్ కా సాత్ – సబ్ కా వికాస్ – సబ్ కా విశ్వాస్ – సబ్ కా ప్రయాస్’ అనే సమతా నినాదంతో యావద్భారత సమగ్ర, సంపూర్ణాభివృద్ధికి ప్రధాని పాటుపడుతున్నారని కొనియాడారు. అల్ పసంఖ్యాకులు వివిధ రంగాలలో అత్యున్నత స్థానాలను అధిరోహించారని అబ్దుల్ నజీర్ కొనియాడారు.
అబుల్ కలాం ఆజాద్, అబ్దుల్ కలాం, ఉస్తాద్ బిస్మిల్లాహ్ ఖాన్, హోమీ భాభా, జె.ఆర్.డి టాటా, శామ్ మానెక్షా తదితరులు దేశానికి చేసిన సేవల వల్ల ఆదర్శప్రాయులుగా, చిరస్మరణీయులుగా నిలిచారని చెప్పారు. ఉగ్రవాదం – అభద్రత – అశాంతి, వెనుకబాటుతనానికి కారణకారకాలని అవి ఉన్న చోట అభివృద్ధి అసాధ్యమని ఆయన అభిప్రాయపడ్డారు.