ఇజ్రాయెల్ హమాస్ యుద్ధం ప్రారంభమై 4 నెలలు కావస్తోంది. ఈ యుద్ధంలో ఇప్పటివరకు 25 వేల మందికి పైగా పాలస్తీనియన్లు మరణించారు. యుద్ధం గాజాలో భారీ విధ్వంసం సృష్టించింది. యుద్దం కారణంగా ఇజ్రాయేల్ కు పాలస్తీనా ప్ర‌జ‌ల రాక‌పోక‌లు నిలిచిపోయాయి.
ఇజ్రాయేల్ లో ఎక్కువమంది కార్మికుల పాలస్తీనా వారే.. ఇప్పుడు వారు రాక‌పోవ‌డంతో తీవ్ర కార్మిక కొరత ఎదుర్కొంటున్న‌ది.. కార్మికులను పంప‌వ‌ల‌సిందిగా భారత్ ను ఆ దేశ ప్ర‌ధాని అభ్య‌ర్దించారు.. దీంతో దేశంలోని కొన్ని రాష్ట్రాలు తమ కార్మికులను ఇజ్రాయెల్‌కు పంపడానికి రిక్రూట్‌మెంట్ డ్రైవ్‌లను నడుపుతున్నాయి. ఈ రిక్రూట్‌మెంట్ డ్రైవ్‌లు హర్యానా, యుపిలో కొనసాగుతున్నాయి. అయితే ఇప్పుడు మరో 5 రాష్ట్రాలు కూడా ఇందులో చేరాలనుకుంటున్నాయి. అవి మిజోరం, తెలంగాణ, రాజస్థాన్, బీహార్, హిమాచల్ ప్రదేశ్. ఇప్పటివరకు, యుపి ,హర్యానా నుండి 5 వేల మందికి పైగా కార్మికులు ఇజ్రాయెల్‌లో పని చేయడానికి ఎంపికయ్యారు.భారత్ నుంచి పెద్ద సంఖ్యలో కార్మికులను ఇజ్రాయెల్ పంపేందుకు ప్రయత్నాలు జరుగుతున్నాయి. ఇజ్రాయెల్‌లో యుద్ధం కారణంగా కార్మికుల కొరత ఉన్నందున వారికి అక్కడ ఎక్కువ డబ్బు లభిస్తుండటమే దీనికి కారణం. ఇజ్రాయెల్‌లో పని చేయాలనుకునే భారతీయులు పెద్ద సంఖ్యలో ఉన్నారు.
భారతదేశానికి వేల కోట్ల రూపాయలు
జనవరి 16-20 వరకు హర్యానాలో దీని కోసం ప్రచారం నిర్వహించారు. ఇక్కడ 1370 మంది అభ్యర్థులు పరీక్షకు హాజరుకాగా 530 మంది ఎంపికయ్యారు. ఉత్తరప్రదేశ్‌లో 7,182 మంది అభ్యర్థులు పరీక్షకు హాజరుకాగా, 5,087 మంది ఎంపికయ్యారు. ఈ విధంగా యూపీ, హర్యానా నుంచి మొత్తం 5 వేల 600 మంది అభ్యర్థులు ఎంపికయ్యారు. ఇజ్రాయెల్‌లో 5 వేల మంది కార్మికులు 5 సంవత్సరాలు పనిచేస్తే, భారతదేశానికి రూ. 5 వేల కోట్లు వస్తాయని సమాచారం.
ఇజ్రాయెల్‌లో కార్మికుల కొరత ఎందుకు
ఇజ్రాయెల్, హమాస్ మధ్య అక్టోబర్ 7న మొదలైన యుద్ధం ఇంకా కొనసాగుతూనే ఉంది. దీని కారణంగా, పెద్ద సంఖ్యలో పాలస్తీనియన్ల వర్క్ పర్మిట్లు రద్దు చేయబడ్డాయి. ఇజ్రాయెల్ నిర్మాణ పరిశ్రమలో పెద్ద సంఖ్యలో పాలస్తీనా కార్మికులు పనిచేశారు. కానీ యుద్ధం కారణంగా వారు ఇప్పుడు ఇజ్రాయెల్‌కు వచ్చి పని చేయలేకపోతున్నారు. అటువంటి పరిస్థితిలో, ఇజ్రాయెల్ తన ఇతర స్నేహపూర్వక దేశాల నుండి కార్మికులు తమ దేశానికి వచ్చి పని చేయాలని కోరుకుంటోంది.
కార్మికులకు సగటున ఇచ్చే జీతం
ప్రస్తుతం ఇజ్రాయెల్‌లో దాదాపు 18 వేల మంది భారతీయ కార్మికులు ఉన్నారు. ఈ కార్మికులు సగటున నెల‌కు రూ. 1 లక్షా 40 వేలు జీతం పొందుతున్నారని చెబుతున్నారు. దీనితో పాటు ఆరోగ్య బీమా, ఆహారం, వసతి వంటి సౌకర్యాలు కూడా అందుబాటులో ఉన్నాయి. దీంతో రిస్క్ అయినా ఇజ్రాయేట్ బాట ప‌డుతున్నారు కార్మికులు ..