హైద‌రాబాద్ : మూవీ టికెట్ ధ‌ర‌లు పెంచ‌బోమంటూ అసెంబ్లీ సాక్షిగా ప్రకటించిన ముఖ్యమంత్రి రేవంత్ రెడ్డి, సినిమాటోగ్ర‌ఫీ మంత్రిపైనా శాస‌న‌స‌భ ఉల్లంఘన తీర్మానం ప్ర‌వేశ‌పెడ‌తామ‌ని మాజీ మంత్రి , బిఆర్ఎస్ పార్టీ ఎమ్మెల్యే హ‌రీశ్ రావు చెప్పారు.
గేమ్ ఛేంజ‌ర్ సినిమాకు టికెట్ల రేట్ల పెంపుద‌ల విష‌యంలో సీఎం, మంత్రిని హ‌రీశ్‌రావు త‌ప్పుబ‌ట్టారు. అసెంబ్లీ సాక్షిగా చేసిన ప్ర‌క‌ట‌న‌ను రేవంత్ స‌ర్కార్ తుంగ‌లో తొక్కిందంటూ నిప్పులు చెరిగారు. పుష్ప-2 మూవీ విడుద‌ల సంద‌ర్భంగా తొక్కిస‌లాట జ‌రిగి ఒక మహిళ మృతి చెందారు, ఇక మీదట సినిమాలకు స్పెషల్ ప్రివిలేజ్ ఇచ్చేది లేదంటూ అసెంబ్లీ సాక్షిగా ప్రకటించిన ముఖ్యమంత్రి రేవంత్ రెడ్డి, రెండు వారాలు కూడా తిరగకముందే ఊసరవెల్లి సైతం సిగ్గుపడేలా మాట మార్చారు అని విమ‌ర్శించారు. టికెట్ రేట్లు పెంచేది లేదంటూ అదే అసెంబ్లీ సాక్షిగా ప్రకటించిన మరో మంత్రి కోమటిరెడ్డి వెంకటరెడ్డి మాటలు సైతం స్వల్ప వ్యవధిలోనే నీటి మూటలు అయ్యాయని హ‌రీశ్‌రావు పేర్కొన్నారు.
అసెంబ్లీలో ప్రకటించిన దానికే విలువ లేకపోతే ఎట్లా ? అసెంబ్లీని కూడా తప్పుదోవ పట్టిస్తూ టికెట్ రేట్లు, అదనపు షోలకు అనుమతి ఇవ్వడం సభను అవమానించడమే. అసెంబ్లీని తప్పుదోవ పట్టించినందుకు ముఖ్యమంత్రిపై, మంత్రిపై సభా హక్కుల ఉల్లంఘన కింద ప్రివిలేజ్ మోషన్ పెడతాం అని హ‌రీశ్‌రావు తెలిపారు.
మాట తప్పం, మడమ తిప్పం అంటూ బీరాలు పలికి ఇప్పుడు టికెట్ రేట్ల పెంపునకు ఎలా అనుమతి ఇచ్చారు? ఎవరికి లబ్ధి చేకూర్చేందుకు ఈ నిర్ణయం తీసుకున్నారు? గతంలో మీరు బెనిఫిట్ షోలకు, టికెట్ రేట్ల పెంపునకు అనుమతి ఇవ్వడం వల్లే ఒక మహిళ మృతి చెందారు, మరో పసివాడు ఇంకా ఆసుపత్రిలో చికిత్స పొందుతున్నాడు. ఈ పాపం మీ ప్రభుత్వానిదే కదా రేవంత్ రెడ్డి. ఆ దురదృష్ట ఘటనను మరిచిపోకముందే ఎందుకు ఈ యూ టర్న్? దీని వెనుక ఉన్న మర్మం ఏమిటి? అని సీఎం రేవంత్ రెడ్డిని హ‌రీశ్‌రావు ప్ర‌శ్నించారు.