రేవంత్ ప్రభుత్వ నిర్లక్ష్యానికి బలైన వాంకిడి గిరిజన గురుకుల విద్యార్థిని శైలజకు హరీష్ రావు కన్నీటి నివాళులర్పించారు. శైలజ ప్రాణాలు బలి తీసుకున్న పాపం.. ఈ దుర్మార్గపు కాంగ్రెస్‌ను వెంటాడుతుంది అని అన్నారు. ఈ మేరకు ఎక్స్ (ట్విట్ట‌ర్) వేదికగా ఆవేద‌న వ్య‌క్తం చేశారు.
‘‘25 రోజులు వెంటిలేటర్‌పై పడిన నరకయాతనకు ప్రభుత్వమే బాధ్యత వహించాలి. సీఎం రేవంత్ రెడ్డి ఆ చిన్నారి తల్లిదండ్రులకు గుండె కోతను మిగిల్చిండు. తోటి విద్యార్థులతో ఆడుతూ పాడుతూ పాఠాలు నేర్చుకోవాల్సిన ఆ చిన్నారి.. విషాహారం వల్ల కన్నుమూయటం కలిచి వేస్తున్నది.
ప్రభుత్వ నిర్లక్ష్యం అభం, శుభం తెలియని గిరిజన బిడ్డకు శాపంగా మారింది. తల్లిదండ్రులకు తీరని శోకాన్ని మిగిల్చింది. వాంకిడి గురుకులంలో నాణ్యత లేని భోజనం పెట్టడం పాపం కాగా, అస్వస్థతకు గురైన విద్యార్థులకు సకాలంలో మెరుగైన చికిత్స అందించకపోవడం మరొక పాపం.
అడుగడుగునా ప్రభుత్వ నిర్లక్ష్యం, అధికారుల అలసత్వం విద్యార్థిని ప్రాణాల మీదకు తెచ్చింది. నిమ్స్ ఆసుపత్రిలో బిడ్డను పట్టుకొని అక్కడే ఉన్న ఆ తల్లిదండ్రులకు భరోసా ఇవ్వడంలోనూ సర్కారు పూర్తి వైఫల్యం చెందింది. చివరకు ఆ అమ్మాయి చావును కూడా దాచి పెట్టాలనే ఉద్దేశ్యంతో, దొంగ చాటున మృతదేహాన్ని తరలిస్తుండడం సిగ్గుచేటు. గిరిజన విద్యార్థినీ కుటుంబానికి బాధ్యత వహించి 50 లక్షలు ఎక్స్గ్రేషియా ఇవ్వాలని ప్రభుత్వాన్ని డిమాండ్ చేస్తున్నాం. ’’ అని హరీష్ రావు అన్నారు.