దైవ దర్శనానికి వెళ్తూ.. రోడ్డుప్రమాదంలో ఒకే కుటుంబానికి చెందిన ఆరుగురు ప్రాణాలు కోల్పోయిన విషాద ఘటన రాజస్థాన్ జోధ్పుర్లో జరిగింది. బొలెరో- ట్రక్కు ఢీకొనగా ఒకే కుటుంబానికి చెందిన ఆరుగురు ప్రాణాలు కోల్పోయారు. మరో ముగ్గురు తీవ్రంగా గాయపడ్డారు. చురూ నుంచి కారులో.. దైవదర్శనానికి వెళ్తుండగా జోధ్పుర్- జైపుర్ జాతీయ రహదారి వద్ద బిలాడా సమీపంలో అర్ధరాత్రి సుమారు ఒంటిగంటకు ఈ దుర్ఘటన జరిగినట్లు పోలీసులు తెలిపారు.
వేగంగా ప్రయాణిస్తున్న కారు అదుపు తప్పి ట్రక్కు వెనక భాగాన్ని ఢీకొనడం వల్ల ఈ ప్రమాదం జరిగినట్లు పోలీసులు తెలిపారు. ముగ్గురు అక్కడిక్కడే ప్రాణాలు కోల్పోగా మరో ముగ్గురు చికిత్స పొందుతూ మృతిచెందినట్లు పేర్కొన్నారు. మృతులు.. విజయ్ సింగ్, ఉదయ్ ప్రతాప్ సింగ్, మంజూ కన్వర్, ప్రవీణ సింగ్, దర్పన్ సింగ్, మధుకన్వర్ సింగ్లుగా గుర్తించారు. ఈ ఘటనలో గాయపడ్డ మరో ముగ్గురిలో చైన్ సింగ్ అనే వ్యక్తికి స్థానిక ఆసుపత్రిలో చికిత్స అందిస్తుండగా.. పవన్ సింగ్, సంజూ కన్వర్ అనే మరో ఇద్దరిని మెరుగైన చికిత్స కోసం జోధ్పుర్కు తరలించినట్లు పోలీసులు వెల్లడించారు.