కాంగ్రెస్ సీనియర్ నేత గులాం నబీ ఆజాద్ మేనల్లుడు ముబాషర్ ఆజాద్ ఇవ్వాల (ఆదివారం) జమ్మూ త్రికూట నగర్‌లోని పార్టీ ప్రధాన కార్యాలయంలో బీజేపీలో చేరారు. J&K BJP చీఫ్ రవీందర్ రైనా, మాజీ ఎమ్మెల్యే దలీప్ పరిహార్ , BJP ST మోర్చా అధ్యక్షుడు హరూన్ చౌదరి దోడా యువ నాయకుడు ముబాషర్ ఆజాద్‌కు స్వాగతం పలికారు. పార్టీలోకి కొత్తగా చేరిన వారిని స్వాగతించిన రవీందర్ రైనా, కాంగ్రెస్, నేషనల్ కాన్ఫరెన్స్, పిడిపి వంటి పార్టీలు అధికార విలాసాలు అనుభవించడం తప్ప మరేమీ చేయలేదని ఆరోపించారు. జమ్మూ & కాశ్మీర్‌లో ప్రాథమిక స్థాయిలో ప్రజాస్వామ్యం పటిష్టం అయ్యేలా ఇక్కడ నివసించే ప్రతి వర్గానికి హక్కులు కల్పించేందుకు మెరుగైన చర్యలు తీసుకున్నది కేవలం ప్రధాని నరేంద్ర మోదీ నేతృత్వంలోని ప్రభుత్వం మాత్రమేనని ఆయన అన్నారు.
బీజేపీ నాయకత్వ విధానాలను అందరూ మెచ్చుకుంటున్నారని, అందుకే దాదాపు రోజూ చురుకైన సామాజిక, రాజకీయ ప్రముఖులు ప్రజలకు సేవ చేయడానికి పార్టీలోకి వస్తున్నారని ఆయన అన్నారు. ముబాషర్ ఆజాద్ నేతృత్వంలోని ఈ కొత్త చేరికలు దోడా, కిష్త్వార్, రాంబన్, ఇతర ప్రాంతాలలో పార్టీని బలోపేతం చేయడమే కాకుండా జమ్మూ & కాశ్మీర్‌లోని యువకులను దేశం, సమాజం కోసం పనిచేసేలా ప్రోత్సహిస్తాయని రైనా తెలిపారు. ఇదిలా ఉండగా జమ్మూ & కాశ్మీర్‌లో, కేంద్రంలోని ప్రస్తుత కాంగ్రెస్ నాయకత్వం తన మామ, మాజీ ముఖ్యమంత్రి గులాం నబీ ఆజాద్‌ను అగౌరవపరిచినందుకు తాను తీవ్రంగా బాధపడ్డానని ముబాషర్ ఆజాద్ అన్నారు. గులాం నబీ ఆజాద్ పట్ల కాంగ్రెస్ పార్టీ వ్యవహరించిన తీరు సామాన్య ప్రజల మనోభావాలను దెబ్బతీసిందని, మాజీ సీఎం కృషికి ప్రధాని మోదీ గుర్తింపు ఇచ్చారని ఉద్ఘాటించారు. కాంగ్రెస్ పార్టీలో పూర్తి స్వార్థపూరిత అంతర్గత పోరు ఉన్నప్పటికీ, ప్రధాని మోడీ సామాన్య ప్రజల విశ్వాసాన్ని పొందారని, తద్వారా సమాజం మరియు దేశ ప్రయోజనాల కోసం మేము ప్రధాని మోడీ, బిజెపికి అండగా ఉంటామని ప్రతిజ్ఞ చేస్తున్నామని ఆయన అన్నారు.