యూరప్‌ దేశాల్లో అతిపెద్ద ఆర్థిక వ్యవస్థ అయిన జర్మనీ ఆర్థిక మాంద్యం దిశగా వెళ్తున్న సంకేతాలు కనిపిస్తున్నాయి. గురువారం వెల్లడైన 2023 ఏడాది మొదటి త్రైమాసికంలో జర్మనీ ఆర్థిక వ్యవస్థ ఊహించని షాక్‌కు గురైంది. ఆ దేశ జీడీపీ 0.3శాతం తగ్గింది. ఈ పరిణామాలు దేశాన్ని అధికారికంగా మాంద్యంలోకి నెట్టిందనే సంకేతాలను ఇస్తున్నాయి. ఫెడరల్‌ స్టాటిస్టికల్‌ ఆఫీస్‌ తాజాగా విడుదల చేసిన డేటా ప్రకారం, జనవరి- మార్చి మధ్య కాలంలో జర్మనీ స్థూల దేశీయోత్పత్తి లేదా జీడీపీ 0.3 శాతం తగ్గింది. ఇది 2022 చివరి త్రైమాసికంతో పోల్చితే యూరప్‌లోని అతిపెద్ద ఆర్థిక వ్యవస్థలో 0.5 శాతం తగ్గుదలని సూచిస్తుంది.
వరుసగా రెండు త్రైమాసికాల క్షీణత సాంకేతిక మాంద్యాన్ని ఏర్పరుస్తుంది. ఈ గణాంకాలు జర్మన్‌ ప్రభుత్వానికి ఎదురుదెబ్బగా నిపుణులు పేర్కొంటున్నారు. జీడీపీలో పెరుగుదల 0.2 శాతం విస్తరణతో కొసాగుతుందనే జనవరి అంచనాలు తల్లకిందులయ్యాయి. ఇక ఇప్పుడు ఈ అంచనాలను దిగువ దిశగా సవరించాల్సిన అవసరం ఉండొచ్చని ఆర్థికవేత్తలు భావిస్తున్నారు. అధిక ద్రవ్యోల్బణం వినియోగదారుల వ్యయాల్ని ప్రభావితం చేసినట్లు డెకాబ్యాంక్‌ విశ్లేషకుడు ఆండ్రియాస్‌ స్క్యూర్లే చెప్పారు. ఏప్రిల్‌లో ధరలు ఏడాది క్రితం కంటే 7.2 శాతం ఎక్కువగా నమోదయ్యాయని గుర్తుచేశారు.
దానితోపాటు గృహవినియోగం ధరలు, కాలానుగుణ, క్యాలెండర్‌ సర్దుబాట్ల తర్వాత త్రైమాసికానికి 1.2శాతం తగ్గింది. అయితే ప్రభుత్వ వ్యయం కూడా త్రైమాసికంలో గణనీయంగా 4.9 శాతం మేరకు తగ్గింది. ”వెచ్చని శీతాకాల వాతావరణం, పారిశ్రామిక కార్యకలాపాలు పుంజుకోవడం, చైనీస్‌ పున:ప్రారంభం, సరఫరా గొలుసు ఘర్షణల సడలింపు, ఆర్థిక వ్యవస్థను మాంద్యం ప్రమాద జోన్‌ నుండి బయటపడటానికి సరిపోవని ఐఎన్‌జి గ్లోబల్‌ హెడ్‌ ఆఫ్‌ మాక్రో కార్ట్సన్‌ బ్రజెస్కీ చెప్పారు.