తెలంగాణలో డ్రగ్స్ వ్యాపారులను ఏరివేసేందుకు ప్రభుత్వం కఠిన చర్యలు తీసుకుంటోంది. రాష్ట్రంలోని పలు ప్రాంతాల్లో టాస్క్‌ఫోర్స్‌, పోలీసు సిబ్బంది విస్తృత తనిఖీలు చేస్తున్నారు. ఈ సండ‌ర్భంగా భద్రాద్రి కొత్తగూడెం జిల్లా మణుగూరులో పోలీసులు భారీగా గంజాయిని స్వాధీనం చేసుకున్నారు.
ఏపీలోని సీతారామరాజు జిల్లా డొంకరాయి నుంచి మణుగూరు మీదుగా తెలంగాణలోని జహీరాబాద్ వరకు ట్రాలీలో 477 కిలోల గంజాయిని మామిడికాయల మాటున తరలిస్తుండగా పోలీసులు పట్టుకున్నారు. ఐదుగురు నిందితులను అరెస్ట్ చేసిన పోలీసులు వారి వద్ద నుంచి ఒక కారు, ఒక ట్రాలీని స్వాధీనం చేసుకున్నారు. పట్టుబడిన గంజాయి విలువ సుమారు 1.19 కోట్లు ఉంటుందని తెలిపారు.
కుకూకట్ పల్లిలోనూ ఒకరు అరెస్టు ..
అలాగే హైదరాబాద్ నగరంలోని కూకట్‌పల్లి పరిధిలోని వడ్డేపల్లి ఎన్‌క్లేవ్‌లో సోమవారం డ్రగ్స్ స్మగ్లర్లను పోలీసులు అరెస్ట్ చేశారు. బెంగళూరు నుంచి హైదరాబాద్ కు డ్రగ్స్ తీసుకొచ్చి సొమ్ము చేసుకుంటున్న షేక్ ఫరూక్ ను పోలీసులు అరెస్ట్ చేశారు. అతని వద్ద నుంచి 4.1 గ్రాముల ఎండీఎంఏ డ్రగ్స్ స్వాధీనం చేసుకుని కేసు దర్యాప్తు చేస్తున్నారు.
