జాతిపిత మహాత్మాగాంధీ జయంతి సందర్భంగా రాష్ట్రపతి ద్రౌపదీ ముర్ము, ప్రధానమంత్రి నరేంద్రమోదీ ఆయనకు నివాళులర్పించారు. డిల్లీలోని గాంధీ స్మారకం రాజ్‌ఘాట్‌ వద్దకు బుధవారం ఉదయం వెళ్లి మహాత్ముడికి అంజలి ఘటించారు.
అంతకుముందు సామాజిక మాధ్యమం ‘ఎక్స్‌’ వేదికగా ప్రధాని ఆయనకు నివాళులర్పించారు. ”సత్యం, సామరస్యం, సమానత్వం అనే సిద్ధాంతాలతోనే బాపూజీ జీవితం గడిచింది. ఆయన ఆదర్శాలు దేశ ప్రజలకు ఎల్లప్పుడూ స్ఫూర్తినిస్తాయి” అని గాంధీజీని గుర్తుచేసుకున్నారు.
ఆయనతో పాటు పలువురు ప్రముఖులు రాజ్‌ఘాట్‌ వద్ద జాతిపితకు నివాళులర్పించారు.ఉపరాష్ట్రపతి జగ్‌దీప్‌ ధన్‌ఖడ్‌, లోక్‌సభ స్పీకర్‌ ఓం బిర్లా, లోక్‌సభలో ప్రతిపక్ష నేత, కాంగ్రెస్‌ ఎంపీ రాహుల్‌ గాంధీ (దిల్లీ లెఫ్టినెంట్‌ గవర్నర్ వీకే సక్సేనా, దిల్లీ ముఖ్యమంత్రి ఆతిశీ తదితరులు మహాత్ముడి సేవలను స్మరించుకున్నారు.
లాల్ బహదూర్ శాస్త్రి కి కూడా….
ఈ సందర్భంగా ప్రధాని మోడీ ఎక్స్‌ లో పోస్ట్‌ చేశారు. ‘గౌరవనీయులైన బాపు జీవితం మరియు సత్యం, సామరస్యం మరియు సమానత్వంపై ఆధారపడిన ఆదర్శాలు దేశ ప్రజలకు ఎల్లప్పుడూ స్ఫూర్తిగా నిలుస్తాయని’ పోస్ట్‌లో మోదీ పేర్కొన్నారు. జాతిపితగా కీర్తించబడిన మహాత్మా గాంధీ సత్యం, అహింస సూత్రాలను దృఢంగా అనుసరించారని తెలిపారు. ఈ సూత్రాలు ప్రపంచవ్యాప్తంగా ఉన్న అన్ని తరాల రాజకీయ నాయకులు, కార్యకర్తలను ప్రేరేపించాయని పేర్కొన్నారు.
భారతదేశ రెండవ ప్రధానమంత్రి లాల్ బహదూర్ శాస్త్రి జయంతి సందర్భంగా ఆయనకు కూడా ప్రధాని మోదీ నివాళులర్పించారు. “తన జీవితాన్ని దేశ సైనికులు, రైతులు మరియు కీర్తి కోసం అంకితం చేశారు” అని పిఎం మోడీ శాస్త్రి గురించి చెప్పారు. “జై జవాన్, జై కిసాన్” అని లాల్ బహదూర్ శాస్త్రి నినదించారని పేర్కొన్నారు. అతని సరళత, నిజాయితీ అతనికి విస్తృత గౌరవాన్ని సంపాదించిపెట్టాయని మోడీ పేర్కొన్నారు.