ఈ ఏడాది మొత్తం నాలుగు గ్రహణాలు ఏర్పడుతుండగా… ఇప్పటికే రెండు పూర్తయ్యాయి. గత ఏప్రిల్ 20న మొదటిగా సూర్యగ్రహణం ఏర్పడగా.. తర్వాత రెండు వారాలకే మే 5న చంద్రగ్రహణం సంభవించింది. అయితే, ఈసారి ఒకే నెలలోనే రెండు గ్రహణాలు ఏర్పడుతున్నాయి. దీంతో పాటు మరెన్నో ఖగోళ వింతలు, అద్బుతాలకు అక్టోబరు నెల వేదిక కాబోతోంది. అక్టోబరు 14న రెండో సూర్యగ్రహణం ఏర్పడుతోంది. దీని తర్వాత మరో రెండు వారాల్లోనే చంద్రగ్రహణం కూడా సంభవించనుండటం చెప్పుకోదగ్గ విశేషం.
సూర్యగ్రహణం విషయానికి వస్తే.. ఇది కంకణాకార గ్రహణం (రింగ్ ఆఫ్ ఫైర్). అంటే, సూర్యుడిని చంద్రుడి పూర్తిగా నిరోధించినప్పుడు సంపూర్ణ సూర్యగ్రహణం ఏర్పడుతుంది. అలా కాకుండా చంద్రుడు తన కక్ష్యలో భూమి నుంచి దాని సుదూర బిందువు వద్ద లేదా సమీపంలో ఉన్నప్పుడు ఎన్యూలర్ సూర్యగ్రహణం సంభవిస్తుంది. దీని అర్థం చంద్రుడు ఆకాశంలో సూర్యుని కంటే చిన్నగా కనిపిస్తాడు. దానిని పూర్తిగా మూసివేయకుండా అద్భుతమైన దృశ్యాన్ని సృష్టిస్తాడు. చంద్రుడు.. సూర్యుని ప్రకాశవంతమైన ముఖంపై ఒక చీకటి డిస్క్ మాదిరిగా కనిపిస్తాడు. ఇది ప్రకాశించే రింగ్ లేదా ‘రింగ్ ఆఫ్ ఫైర్’ను ఏర్పరుస్తుంది.
అయితే, ఇటువంటి గ్రహణం మళ్లీ 2043లోనే ఏర్పడుతుందని నాసా శాస్త్రవేత్తలు వెల్లడించారు. ఈ గ్రహణం ఉత్తర, మధ్య, దక్షిణ అమెరికాలోని అనేక దేశాలలో కనువిందు చేస్తుంది. NASA ప్రకారం, గ్రహణం అమెరికాలోని ఒరెగాన్‌లో స్థానిక కాలమానం ప్రకారం ఉదయం 9:13 గంటలకు ప్రారంభమవుతుంది (భారత కాలమాన ప్రకారం రాత్రి 8.34 గంటలకు మొదలై.. తెల్లవారుజామున 2.25 గంటలకు ముగుస్తుంది). కాలిఫోర్నియా, నెవాడా, ఉటా, అరిజోనా, న్యూ మెక్సికో, టెక్సాస్ మీదుగా కొనసాగుతుంది.
మెక్సికో, గ్వాటెమాల, బెలిజ్, హోండురాస్, నికరాగ్వా, పనామా, కొలంబియా, బ్రెజిల్‌లోని కొన్ని ప్రాంతాల్లోనూ కనువిందు చేసి.. అట్లాంటిక్ మహాసముద్రంలో సూర్యాస్తమయం సమయంలో ముగుస్తుంది. ఈ పాక్షిక గ్రహణం చాలా ప్రాంతాల్లో కనిపించి, పరిశీలకులకు ఆకట్టుకునే దృశ్యాన్ని అందిస్తుంది. భారత్‌లో మాత్రం ఈ గ్రహణం కనిపించదు.
3,476 కి.మీ వ్యాసం కలిగిన జాబిల్లి.. 1.4 మిలియన్ కి.మీ వ్యాసం కలిగిన సూర్యుడితో పోలిస్తే చంద్రుని పరిమాణం చిన్నదే అయినప్పటికీ ఇది మన గ్రహానికి దగ్గరగా ఉన్నందున భూమి నుంచి చూసినప్పుడు సూర్యుని ముఖాన్ని దాదాపుగా కప్పి ఉంచగలదు.
గ్రహణాలతో పాటు అక్టోబరు 10న అద్భుతమైన డ్రాకోనిడ్స్ ఉల్కాపాతం. ఇది డ్రాగన్ వేగా నక్షత్రం సమీపంలోని డ్రాకో కాన్స్టెలేషన్ నుంచి ఉద్భవించింది కాబట్టి డ్రాకోనిడ్స్‌గా పిలుస్తారు. అక్టోబరు 21-22న ఓరియోనిడ్స్ ఉల్కాపాతం కూడా కనువిందు చేస్తుంది. ఇది తిరిగి 2061లో మళ్లీ దర్శనమీయనుంది.