ఓ ఘోర రోడ్డుప్ర‌మాదంలో ఆరుగురు అక్క‌డిక‌క్క‌డే మృతిచెందిన విషాద ఘటన ఇవాళ తెల్లవారుజామున ఉత్తరాఖండ్ రాష్ట్రంలోని డెహ్రాడూన్ లో చోటుచేసుకుంది. అలాగే మరో వ్యక్తికి తీవ్ర గాయాలు కావడంతో హుటాహుటిన స్థానిక ఆసుపత్రికి తరలించి చికిత్స అందిస్తున్నారు. కాగా ఈ ప్రమాదం రాత్రి 2 గంటల సమయంలో ఓఎన్జీసీ కూడలి సమీపంలో చోటు చేసుకున్నట్లు డెహ్రాడూన్ ఎస్పీ సిటీ ప్రమోద్ కుమార్ తెలిపారు.
మృతులు ప్రయాణిస్తున్న కారును కంటైనర్ బలంగా ఢీకొట్టడంతో ఈ ప్రమాదం చోటు చేసుకుందని.. కంటైనర్ డ్రైవర్ ను అరెస్ట్ చేశామని తెలిపారు. ఈ ప్రమాదంలో ముగ్గురు బాలురు, ముగ్గురు బాలికలు మృతిచెందగా, ఒక బాలుడి పరిస్థితి విషమంగా ఉండడంతో ఆస్పత్రిలో చికిత్స అందిస్తున్నామని, ఏడుగురు అబ్బాయిలు, అమ్మాయిలు కలిసి కారులో వెళ్తున్న క్రమంలో ఈ ప్రమాదం చోటు చేసుకుందని.. మృతుల వయస్సు 25 ఏళ్ల లోపు ఉంటుందని ఎస్పీ సిటీ ప్రమోద్ కుమార్ చెప్పారు.