యూరోపియన్ ఛాంపియన్‌షిప్‌లో భాగంగా ఈరోజు జరిగిన మ్యాచ్‌లో క్రొయేషియా, అల్బేనియా జట్లు తలపడ్డాయి. అయితే, ఈ మ్యాచ్ డ్రాగా ముగిసింది. ఉత్కంఠగా సాగిన ఈ మ్యాచ్‌లో తొలి అర్ధభాగంలో దూకుడుగా ఆడిన అల్బేనియా 11వ నిమిషంలోనే ఒక గోల్ చేసింది. దాంతో విరామ సమయానికి స్కోర్ 1-0తో నిలిచింది.
అయితే రెండో అర్ధభాగంలో పుంజుకున్న క్రొయేషియా 74వ, 76వ నిమిషాల్లో వరుసగా రెండు గోల్స్ చేసి ఆధిక్యంలోకి దూసుకెళ్లింది. చివరకు 90వ+5వ నిమిషంలో అల్బేనియా మరో గోల్ చేయడంతో మ్యాచ్ డ్రాగా ముగిసింది.
గ్రూప్-బిలో ఉన్న ఈ రెండు జట్లు ఇప్పటికే ఒక్కో మ్యాచ్‌లో ఆడి ఆ మ్యాచ్‌ల్లో ఓడిపోయాయి. ఇక నేటి మ్యాచ్ డ్రాగా ముగియడంతో ఇరు జట్ల‌కు ఒక్కో పాయింట్ కేటాయించారు. దీంతో అల్బేనియా (1)తో మూడో స్థానంలో, క్రొయేషియా (1)తో అట్టడుగు స్థానంలో ఉన్నాయి.