కరోనా నివారణకు అందరూ వ్యాక్సిన్ వేయించుకోవాలని వైద్యలు చెప్తున్నారు. ఎందుకంటే టీకా వేయించుకున్న తర్వాత శరీరంలో యాంటీ బాడీలు ఉత్పత్తి అవుతాయి కాబట్టి అవి కరోనా రాకుండా అవి అడ్డుకుంటాయి. కానీ కొందరికి మాత్రం కరోనా టీకా వేసుకున్నాక ఒంట్లో కరెంటు పుడుతోంది. శరీరం బుల్లి విద్యుత్ కేంద్రంగా మారిపోయింది. భుజంపై వ్యాక్సిన్ వేసుకున్న చోట ఎలక్ట్రిక్ బల్బు పెడితే.. అది జిగేల్‌మని వెలుగుతోంది. ఏదో ప్లగ్‌లలో పెట్టినట్లుగా ఇళ్లంతా వెలుతురు ఇస్తోంది.
వివరాల్లోకి వెళ్తే.. కర్నాటకలోని హుబ్లీకి చెందిన సుమంత్, దీక్ష అక్కాచెల్లెళ్లు. ఇద్దరి వయసు ఇంచుమించు 20 ఏళ్ల వరకు ఉంటుంది. వీరిద్దరూ ఇటీవల కరోనా టీకాలు వేసుకున్నారు. వ్యాక్సిన్ వేసుకున్న తర్వాత సుమత్ ఓ ఎల్‌ఈడీ బల్బుతో ఏవేవో ప్రయోగాలు చేశాడు. ఆ సమయంలో వ్యాక్సిన్ వేసిన చోట బల్బు తాకగానే అది వెలిగిపోయింది. దానిని చూసి సుమంత్‌తో పాటు కుటుంబ సభ్యులు కూడా షాక్ తిన్నారు. మళ్లీ శరీరంలోని ఇతర భాగాలపై బల్బును పెడితే వెలగడం లేదు. సరిగ్గా సూది దిగిన చోట పెడితేనే వెలుగుతోంది. అది కూడా చిన్న బల్బు కాదు. మన ఇళ్లల్లో వాడే 9వాట్స్ బల్బు. వీరిద్దరు బల్బును వెలిగిస్తున్న వీడియోను సోషల్ మీడియాలో పోస్ట్ చేయడంతో వైరల్‌గా మారింది.
ఈ వింతను చూసేందుకు చుట్టుపక్కల ప్రజలు తరలి వస్తున్నారు. మా కోసం ఒక్కసారి బల్బు వెలిగించవా.. అని అడుగుతున్నారు. ఐతే మరికొందరు మాత్రం దీన్ని కొట్టిపారేస్తున్నారు. ఇది వింత కాదు పబ్లిసిటీ స్టంట్ అని సెటైర్లు వేస్తున్నారు. అది రిమోట్‌తో ఆపరేట్ చేయగలిగే ఛార్జింగ్ బల్బు అయి ఉంటుందని అనుమానం వ్యక్తం చేస్తున్నారు. లేదంటే కరోనా టీకాకు, కరెంటు‌కు సంబంధమేంటని ప్రశ్నిస్తున్నారు. కానీ ఈ వీడియో మాత్రం సోషల్ మీడియాలో వైరల్ అవుతోంది.
